CorseCurteMarç#05 – Sclopetadis e fusetis

#05 – Sclopetadis e fusetis

E jere une zornade plombice, l’Invier si jere insiorât in chê grande planure sterpe, si viodevin dome cualchi file di staipis di cjanussis. I morârs, dispueâts des fueis, a someavin dai scheletris, come se i lôr ramaçs a fossin dai braçs si slungjavin in cercje dal bon timp che ju varès vistûts. Cualchi piçule besteute salvadie e coreve dilunc chês cumieris di tiere dure e glaçade cirint la tane par metisi al sigûr.

Come se fos une rapresentazion teatrâl dramatiche e jentrà in sene une femine corint come une sfolmenade, al pareve che  scjampàs di cualchi menace, e veve tai braçs un frutin, il nini, cui braçuts ator dal cuel di sô mari, al veve bocje di ridi, la femine i veve dit che al jere un zûc, ancje jê e cirive di ridi, ma ben altris pinsîrs e veve tal cjâf, chel di meti a salf il so frutin des sgrifis di chel danât mostri che al jere aes lôr spalis. E veve scugnût lassâ dut, il paîs, la cjase e chel om che nol podè compagnâle, no lu lassarin.

Ai rivà chel moment dulà che lis fuarcis le stevin bandonant, il so cûr al leve a mil, ma no voleve fermâsi. Di bot si sintì une sclopetade che e rompè il cidinôr dal puest, come une secuence di flash fotografics e metè in azion  une insolite ativitât in chel lûc solitari e gram, un scjap di corvats, sveâts dal colp, si meterin in svol craçânt.
La femine cul so frutin in braç e sbrissà colant dentri di une  cumiere profonde. La zone e jere plene di chestis trinceis lassadis viertis daspò di azions belichis di vecje date.

Al istant si discjadenà une pestefole. Il cîl si jemplà di bots e di sclops, di fusetis di ducj i colôrs che a formavin figuris come chês che si viôt intun caleidoscopi. Dai lontans paisuts e rivavin i glons des cjampanis tocjadis a martiel. Si jere rote la pâs.
Il frutin al cjalave incantesemât chel spetacul.
Al sacodâ la femine intant che al diseve:
«Mame, mame, cjale, o sin rivâts e je scomençade la fieste!»

di Galliano di Buenos Aires (Sicheduncje)
#1209