CorseCurteMarç#03 – Un amì fedêl

#03 – Un amì fedêl

Il vint crudêl mi gjave chel pôc di cjalt che o ai ancjemò ator, e la cinise e svole lizere cheste gnot. Ma cemût soio rivât a chest? Cui crodino di jessi chescj… maledets par lassâmi fûr masse timp? A zenâr, pardabon!
“Indrì, no tu puedis fâ ce che tu vuelis, ancje se al è just!” mi disevin ducj. Ma o jeri convint e o soi lat indevant.
O soi sigûr che a crodin di vêmi pleât. O soi in zenoglon, e je vere, ma no moli lis mês ideis.
“Che al spieti. Al vignarà dentri cuant che o crôt che al vedi vût avonde”.
Mi pâr di sintîlu Grigôr, spietât, a gjoldi la sô vitorie. E jê! Di sigûr a bracecuel dal vecjo, riduçant. O volevi ben a Matilde, ducj mi disevin che e jere cun lui, ma jo no jeri sigûr. E o sin achì, jo fûr, e lôr dentri.
E se mi lassin jentrâ, e cuant che dut al à finît, cemût fasio a tornâ a cjase? Al sarà dut sierât. Di sigûr cualchidun mi spietarà tal scûr par puartâsi vie dut ce che al è miò. Cui podaressial judâmi?
Sigjeart! Al è stât simpri un bon ami, al sarà lui la mê salvece. I mandi un messaç cuant che mi instradi. No mi lassarès mai di bessôl, al è veramentri l’unic amì fedêl che mi reste. Si scuen di pensâ di cemût ringraciâlu. Al à di dut, ma alc i podarès mancjâ, o crôt. No sarès cui che o soi se no savès valutâ la int.

– Parcè puartistu cheste robe fûr dal barcon, nono? – il frut al jere simpri ator di Mauro, cuant che al lave là vie a cjatâ la fie e la sô famee. I veve viodût gjavâ fûr che bandiere de valîs cence capî nancje ce che e jere cheste stofe pleade cun cetante cure.
– Doman e je la fieste de Patrie. Cognossistu la storie?
– Isal Batman dentri? – Al domandâ il piçul, cun sperance. Ai siet agns une storie buine e à di vê dentri un eroi fuart e sfidant.
– Un tabâr al veve, lu ai propit viodût, nol è neri però. Al è blu cuntune acuile di aur. Ven chi che ti conti…

di Noemi Salva (Passarute)
#1207

2 comments