CorseCurteMarç#02 – “A VIOLIS PAI PRÂZ”

#02 – “A VIOLIS PAI PRÂZ”

Jacume!
Daspò doi agns e torne la fieste in paîs. E jere ore! O provavi nostalgjie dal motoraduno, ancje se si sintive chel casin pardut, de marcelungje clamade “A violis pai prâz”, des gjostris, de luianie cu la polente tai bancuts e de gare ciclistiche.
“State in banda dello svolto, che passano i corridori!”
Cussì al diseve pal altoparlant Vigji, il simpatic omenon che al faseve di speaker uficiâl de fieste. E po, vint savût che a jerin dai laris che a robavin tacuins tra la int, al zontave: “È  una ghenga che gira a rubare i taccuini ma noi li prenderemo e li appenderemo sul palo della cuccagna!”
Tancj agns a son passâts e lui nol è plui cun nô. No lu dismentei, stant che al è stât par agns la anime dal paîs.
Ce biel che la fieste e torni: la int e à voie di amicizie, di stâ insiemit, di tabaiâ e di bevi un tai. E à voie di divertîsi. Se no, ce stino a fâ tal mont?
O larai ancje jo a contribuî, come che o ai simpri fat, an dopo an, prime di chê brute pandemie. Cheste volte mi metarai cun altris feminis dal paîs a vendi i centrins che a àn fat lis nestris bravis muiniis. Metât dai bêçs che o vuadagnarìn a laran a la Pro Loco. Le altre metât a lis missions in Afriche.
E dopo, cui sa che nol rivi ancje Bert, cu la sô Harley Davidson. Al è un mio amì dai timps di scuele. O vevin vût une storie cetancj agns indaûr ma dopo mi jeri sposade cun Barnabe che pûr trop mi à lassade vedue za fa cinc agns. Sperìn che al vegni Bert che lu saludi. Chei che lu cognossin mi vevin dit che al jere avilît pal Covid ma che cul gnûf an al è tornât come prime, plen di snait.
Cumò o stoi sintint musiche pa la radio; oh, ve che al rive il notiziari:
COMUNICAZIONE DELLA PRESIDENZA DEL CONSIGLIO DEI MINISTRI: A CAUSA DELLA GRAVE CRISI INTERNAZIONALE IN UCRAINA CHE HA COINVOLTO LA NATO IN QUANTO GARANTE DELLA “NO FLY ZONE”, LA FEDERAZIONE RUSSA HA DICHIARATO GUERRA ALLA NATO. PERTANTO È INDETTO COPRIFUOCO DALLE OTTO DI SERA. OGNI MANIFESTAZIONE CULTURALE E LUDICA È CANCELLATA.

di Checo Tam (Tapioca City)
#1206

2 comments