CorseCurteMarç#01 – 61

#01 – 61

Il prin di cuatri in dîs agns. Sô mari ’nt veve dome disesiet. Lui, vedran fin a cincuantetrê, al veve maridade une ucraine di vincjevot e vût Aliosha a cincuantesîs.
Il casin che i vevin fat lis sûrs! I agns di diference a jerin il mancul, Marisa e Menute si jerin sustadis parcè che Mila e vignive di fûr, e ce fûr: une foreste dal Est. Carleto, so fradi, al veve mostrât une invidie malmostose, di chês che ti rosein di dentri.
Mario al veve tal cjâf di fâ un fieston pai sessante, chês robis che tu vierzis il curtîl e dentri ducj, che par fâ fieste baste vê gust e gole, salams picjâts e cualchi damigjane di chel bon. I pareve la maniere di meti a puest la cuistion ancje cun fradi e sûrs.
Invezit l’infet al veve mandât par aiar dut, parfin i salams, che nol jere rivât nancje a purcitâ. Al veve fat fente di nie. Mila, puarine, si jere dade da fâ a meti sù coriandui e bandierutis di ogni colôr e il picinin al veve cjantât cun chê vosute stentade “Tanti auguli a te, papi!”, che la r ancjemò no i vignive. Une torte cul “60” scrit in curisins, une creme fofe e un tai di ribuele spumantizade. Dome lôr trê. Aliosha si jere indurmidît cul dedut in bocje intant che lôr si bussavin.
E vuê e jerin sessanteun. Il circ al jere scomençât a buinore, cul piçul rivât tal jet cuntun dissen par “papi”. Daspò des vot, telefonadis e messazuts a nastro. A misdì al veve bielzà lis balis plenis; lu vevin ancje clamât par un lavôr e i sarès lât vie dut il dopomisdì.
Aromai cul furgon tal garage nol veve fat câs a lis lûs. Dut un bot al jere vignût scûr come in bocje. Cuant ch’al jere jentrât in cjase un cidin sbaliât, fûr lûc. “Sorpresa!” La vosute di Aliosha, daspò lis manutis grampadis su lis sôs gjambis. La lûs e jere tornade. Inte cusine suntun linçûl une scrite: “Augurons, Mario. Sessante ju festègjin dome i basoâi.” Daûr a jerin ducj: Carleto, Marisa, Menute e lis lôr fameis, il borc intîr e ducj i amîs. Denant e jere Mila, doi voi spalancâts di amôr e la bocje che e rideve.

di Silva Ganzitti (Copasse Blu)
# 1205

1 comment