#21 – La Ete dai Flôrs
“Podìn ancjemò cjapâ il Palaç, ma o vin di movisi!”
“No, miôr spietâ che la int e cjapi plui coraç, no sin ancjemò avonde!”
Luh no saveve cui che al veve reson. Une robe però le veve clare: lis emozions che a stevin daûr des peraulis. Pôre, disilusion, sperance. E jere nassude cussì: un mostri di empatie che cualchi volte al someave gnogno.
“Veso sintût il Gjenerâl? Se a bechin cualchidun a judânus lu soterin cence nancje copâlu!”
“Forsit o varessin di fevelâi, amancul par cjapâ timp!”
Luh si svicinà al Façolet Vert de Resistence in persone: “O voi jo”.
Sustât, lui al disè: “Mê fie e propon di lâ je a fevelâ cu la Zonte. Volarès savê parcè”.
E jê: “A-a àn di jessi altris mieçs par otignî ce che o volìn.”
La stanzie e sclopà di ridadis sbocjassadis. “Cumò o varessin di stâ a sintî une frutine!” “Sigûr che nus daràn il podê ‘cun altris mieçs!’”
Luh e sierà i voi e e berlà: “Ce voleiso voaltris pardabon?”
La frute e rispuindeve!
“E ce vûstu che volìn? Il podê, po!” al disè un.
Luh si sintì come disvuedade. “Ce voleiso voaltris, pardabon?” e insistè.
Cidinôr. Cuasi si jerin dismenteâts dal parcè di chel riviel.
“Jo o volarès tornâ a vê un lavôr, ma plui biel! E timp par me!”
“Jessi libar di lâ dulà che o vuei!”
“Tornâ a jessi un Savi di Assemblee e discuti dal nestri avignî!”
“Jo o volarès che par vivi no vessin di copâsi tra di nô e nancje copâ lis bestiis!”
“O voi dal Gjenerâl”, e disè Luh.
“Bon Luche, cumò duâr.”
“Dai, mama, va indevant!”
“Nein! Buinegnot!”
Luche al saveve ben chê storie, le veve ancje studiade a scuele. Si datave propite dopo dal incuintri de Resistence cu la Zonte il principi de Ete dai Flôrs, un timp di pâs e benstâ che al durave dal 2067. Il Gjenerâl al jere fintremai deventât famôs pal so discors di cumiât, dulà che, fevelant de terace dal Palaç, al diseve di vê capît di no rivâ a gjestî il podê e i soi efiets. Ricognossint che lis ideis de Resistence e jerin plui bielis des sôs, al veve cedût il podê ai Façolets. E intant che al fevelave al butave jù su la int rosutis di ducj i colôrs: une ploie fofe di sperance. La liende e diseve che e jere stade Luh a fâlu rifleti sul sens de vite e su trop che al è miôr, ancje par se stès, condividi ce che si à cun chei altris. Logjic, al pensave Luche. E cemût vevie di lâ senò?
di Margarite Cogôi (Volketitrei-Liga)
#1196
