Contis di pandemie – Il paîs dai abraçs

Al jere un piçul paîs di mont che come tancj altris al veve un non alegoric: “Il paîs dai abraçs”. Ogni buinore fûr e dentri cjase la int si abraçave dantsi il bundì.

Ma une zornade chest paradîs al pierdè la sô identitât. Un megafon dal sunôr incuietant al passave pes viis ripetint la stesse solfe: – Proibît abraçâsi, proibît svicinâsi, proibît, proibît sot pene di une severe multe.

La pandemie e jere rivade e in dut il mont si cjapavin misuris dal gjenar.

Nol jere facil spiegâ ai fruts che l’abraç des nonis al jere deventât un reât. Resisti cun fantasie al jere l’impen, par podê dâ il stes calôr dai abraçs mantignint distancis e mascarutis.

In paîs une liende e contave che secui indaûr un mostri si jere incagnît, terorizant  e causant un disio di muarts, la int spaventade e jere lade a viodi un vecjo strolegant, considerât la persone che ju podeve judâ. E lu à fat scartabelant in vecjos libris di magjie, rivant cun des formulis a sierâ chê maledizion deformade intune grote e cussì dut chel davoi al finì. Lis valadis a tornarin a sei ligriosis jemplantsi di vite e di tante fantasie.

La int di vuê e pensave che a cause di cualchi taramot, tant comun in chê zone, la piere che e taponave la grote e jere sparide e che il mostri si jere liberât, e volint rivendicâ chel so antenât, al veve discjadenât in dut il mont un cjadaldial clamât pandemie.

I  sientifics che lu vioderin a traviers di un microscopi a diserin che daspò di vê vudis tantis mutazions dulinvie lis etis, si jere trasformât intun gjen cul cjâf tont e plen di grumbulis. Si che duncje, cheste piçulissime entitât e faseve part de gjenie di chê besteate di altris timps.

Tai timps de liende, la int e jere lade a cirî un strolegant che ju gjavâs fûr di chê pestefole. Tai nestris timps i oms di sience a saran chei che nus difindaran di cheste spade di Damocli, che ducj o vin parsore dai nestris cjâfs, leade a penis cuntun cjaveli di cjaval.

E che tal paîs dai abraçs la int e spiete cun tante sperance di podê tornâ a abraçâsi ogni buinore, fûr e dentri cjase dantsi il bundì.

di Galliano di Buenos Aires
#1204

1 comment