Lets in Ostarie: Gjviano di uno vôlto

Gjviano di uno vôlto
di Pieri Pinçan
Tumieç, 2003.

CE LIBRI ISAL?
Un libri di dusinte e trente pagjinis, risultât di une vite interie di studis, di documentazion e di passion par chest paîs che, magaricussìno, al è daûr a disvuedâsi. Al è stât finanziât di une famee di Viterbo che e à une cjase a Gjiviano e che l’autôr al considere gjvianots a ducj i efiets.

MA CE ISAL DENTRI, DI PRECÎS?
La storie dal paîs fin des origjns (il prin document al è dal 1322), la glesie (e il non di ducj i predis dal 1764 fin al 2000), la scuele, la latarie turnarie, il cimiteri, la toponomastiche, lis cjasis, lis vueris (cui nons dai muarts), il bosc cun dutis lis barufis pai cunfins e cu la istituzion dal consorzi dal 1869, la maine, la canoniche, il grop corâl (cui nons dai mestris), la religjon, lis tradizions, lis fiestis, une piçule racuelte di poesiis dedicadis a Gjviano. Ma la part salacor plui straordenarie e je l’arbul gjenealogic di ducj i abitants dal paîs, famee par famee, a partî dal 1774. E in plui dissens dal autôr e fotografiis di epoche.

MA CUI ISAL L’ AUTÔR?
Pieri Pinçan (o Di Vau), (1925-2018), un dai pôcs gjvianots che a àn volût restâ a vivi là sù, sot di chel cjampanîl dut colorât che si viodilu di lontan. Muradôr, emigrant, animadôr culturâl, autonomist, gjornalist.

A CUI I PUEDIAL PLASÊ?
A ducj i gjvianots che a son ator pal mont, ai lôr fîs e ai lôr nevôts. Ma ancje a cui che si interesse di storie locâl, di Cjargne, di antropologjie. A cui che al pense che il patrimoni di culture dai paîs di une volte nol vedi di lâ pierdût.

E SE O AI VOIE DI CJOILU?
No savìn se al è in cumierç. Provâ a domandâ a la tipografie Andrea Moro di Tumieç, via Torre Picotta 42, info@tipografiamoroandrea.it