CorseCurteZenâr#25 – Trasfigurâsi

#25 – Trasfigurâsi

E e je simpri chê robe di fâ fente, il jessi diviers di chel altri, il trasfigurâsi. Lu vin za viodût te storie, a voltis leade ae miserie, une sorte di gjandusse o une altre malatie che nus fâs pensâ che no varìn une chance di cambiâle chê miserie.
Tal vincjesiet di Fevrâr di mil cinccent e undis, chei puars cudicjs che si vistivin di siôrs in mascare, stant che e jere dongje une pandemie, si platavin cussì dal “seseladôr”. Chei puars no pensavin che ancje i siôrs a podevin vê pôre dal “seseladôr”, o dai pizighets di impestâts.
Cuant che “Il Griso” (il personaç di Manzoni) al cjapave dut ce che al podeve puartâsi daûr des robis di “don Rodrigo”, no dome pal valôr intrinsic di chês, ma par trasfigurâsi, par jessi un moment lui siôr e no il puar Griso.
Alore, saressino cumò in tune epoche par fâ fente di jessi un altri? Stant che une pandemie nus puarte intun univers savoltât. Ma nol covente metisi sù une mascare te muse par trasfigurâsi, par taponâ i pinsîrs. O vevin bielzà un grum di manieris di mudâ l‘aspiet. No veso viodût trops oms cun la barbe lungje che a platin daûr dai pêi lis carateristichis faciâls? O chês fantatis, e no dome, cui cjavêi piturâts di colôrs?
Sono lis mascaris di vuê chescj cjavêi piturâts e barbis? Sono lis mascaris che si fasevin tai nestris paîs o a Vignesie tal secul Disevot?
Lis mascaris nus son dongje, in dutis lis culturis dilunc dal timp. Sono stadis simpri a taponâ i pinsîrs, par fâ fente di jessi diferent di ce che la vite ti à dât dal principi?
Par sierâ in bielece, us lassi lis peraulis di un bonom dal Votcent american: “Us consei di liberâ i vuestris pinsîrs e di no trasfigurâsi, tant che al è cetant biel sintî la muse libare tal aiar viert.”
King C. Gillette

di Eduart Baschera (Acuari Cence Branchis)
#1175