CorseCurteZenâr#24 – Il tesaur dal flum

#24 – Il tesaur dal flum

La cjase vueide e stave in vuaite su la culine, darote e bandonade, pôc prin di rivâ a Zulugnâ di Sore. Dome il mûr che al cjalave a misdì al jere restât intîr. Alì une man anonime e veve piturât un dissen di flabe: trê aganis a cjaval di trê pes: un luç, un bisat e une raine. A vevin l’aspiet di bielis fantatis cui cjavei di alighis, e voi verts che a inmagavin.
I paisans di Zulugnâ a vevin cjatât il dissen misteriôs une matine di Zenâr. Ai doi di Fevrâr al jere nassût Perin, un frutin che nol veve vaiût subit ma al veve cjalât fis in muse la comari. “Cussì piçul e za al viôt miôr di un grant” e disè la none.
Cressût, il canai al passave dispès par li de cjase rote, ma la mame i veve dit di no fermâsi, e lui al scarpetave jù pal troi che al menave a Zulugnâ di Sot, par lâ a scuele.
Rivât al puint de Aghe Blancje, a Perin i pareve di sintî a riduçâ framieç dai vencjârs. Vosutis sutilis che lu clamavin: “Perin, ven cun nô, ti darìn un tesaur!”
Il frut i de di comedon al so amì Jacum: “Dipo, âstu viodût?”
“Ce robe?”
“Mi pâr che a sedin des fantatis a fâ il bagn!”
“Po si po, cui vûstu che al ledi te aghe cun chest frêt!”.
Chei altris fruts lu cjolevin vie pai strambolots che al contave, dome Jacum nol faseve cussì.
Deventât fantat, Perin al le a studiâ a Udin, là che no jerin aghis salvadiis ni vencjârs, e si smenteà di chês che cumò i someavin dome fufignis di frut.
Rivade l’Istât al jere tornât in mont, e là al veve cjatade Silvie, fantacine vignude di lontan a stâ in paîs. Fie di une fade? al pensà Perin. Cui cjavei luncs e neris, il pît lizêr e i voi salvadis, la fantate e coreve jù pal troi e lu clamave ridint. “Perin, anìn a fâ il bagn!”
Il sanc i coreve ferbint tes venis, il soreli al impiave l’Istât dentri il cûr: impussibil resisti.
Te aghe frescje i doi zovins si cjalavin tai voi.
“Ti fasarai viodi un tesaur!”
Silvie lu cjapà pe man. Dulà volevie menâlu? La aghe e deventave simpri plui frede, e chei cjavei, no plui neris ma verts, i involuçavin braçs e gjambis.
“Il gno tesaur al è là che l’aghe e je plui fonde, ven cun me, e o sarìn insiemi par simpri!”
Perin, che nol jere mai stât content framieç dai oms, al cjalà dome un moment la rive lontane, e po al le cun jê.

di Stralunade (Atletic Gjatui)
#1174

1 comment