#18 – Pavee

“Ou, fantats, alore? Si fasie la fieste?”
“Saltìn. Miôr”
“mavacaga”
“e cui nocaz ce fasìno”
“si taconin”
“tu tâs che no tu lu âs fat nancje tu”
“ma jo il grincaz lu ai che mi soi cjapât l’omin crot”
“mi vês rot. Mi gjavi”

Martina e tire il telefonut sul jet. No à mai glotût whatsapp ma di cualchi timp al è simpri plui complicât vê a ce fâ cu la int. Soredut cuant che si fevele di chest argoment che plui si cîr di sghindâlu e plui al torne su la ponte de lenghe. I pâr di no cognossi plui nissun, nancje i amîs che e je cressude insiemi. Al è simpri plui dificil rivâ a discori di alc cence cavilâsi. Ancje par une stupide fieste di carnevâl. E suspire, po e torne a cjapâ in man il Samsung. La conversazion e je lade indenant cuntune schirie di messaçs inutii.
“Fieste il 24 tor 6 e alc in canoniche. Cun chei cence vacine si viodìn in linie”. E met in bande il telefonut, savint di vê dade la imboconade pe barufe, ma a un ciert pont si è ancje stufade di fâ la ninine. Cussì come che a ‘nd à une sglonfe di stâ sierade, meti il fren a man e lassâ che lis pagjinis de sô storie a ledin indevant cence vêi scrit nuie parsore.
I dîs a corin, tal grup a tachin a zirâ lis primis fotos, jê e reste fumose. E passe il timp in cjamare, e no par che a son tornâts in dad. Dongje dal jet, barilots di vinavil, temparis, peçots. Fin che e cjate la cumbinade juste. E je pronte.

La joibe e da une man a preparâ la canoniche po, tor cinc, si siere tal bagn e e tache a preparâsi. Il stanzon al tache a folcjâsi. A son aromai rivâts ducj – principessis, striis, fraris, cunin, mumie e altris personaçs – cuant che e ven jù. Ducj si voltin a bocje vierte. E je crote. Dal dut. Ma nol è chel a fâju restâ incocalîts. E je cence mascarute. E chei lavris di femine che si mostrin ribei a incjantin ducj. Martina e rît e dome une volte dongje, il riflès al lasse intraviodi il strât di vinavil che le involuce tant che une galete. Une galete che e ten dentri une pavee aromai pronte a petâ il svol.

di Fuguline (Cjicechepicjedispicjelacite)
#1168