CorseCurteZenâr#13 – La fieste

#13 – La fieste

Ce balis! Ce-pâr-di-balis! Ancje chest an mi tocje a mi. Parcè che jê e à “la riunion in Direzion”. E no si pues migo saltâle. E jo? No ao un lavôr ancje jo. E no! O stoi a russâmi, jo. Ce po!
«E je ancje tô fie!» Sì mo sì, lu sai ben. Ma za l’an passât o ai scugnût lâ jo…
O jentri te scuele e al è za dut un tapêt di curiandui e di chê cragne di sbrume che si tache sot des scarpis e ti somee di vê talpassât une miarde.
A colp, mi rive dongje la mestre di mê fie, cun chê insopuartabile vôs di cheche:
«Bundì! Ce biel che al à vignût ancje Lui. Al è impuartant vê i gjenitôrs ae fieste di carnevâl de scuele.»
«Mestre Paola sigûr! No sarès mancjât par nissun motîf. Pa mê frute al è il minimo!»
Mi volti fasint fente di cirî mê fie, cussì mi tiri vie di chê ocje. Di mâl in pies dutcâs, parcè che mi lampe la mame di Adele. Ancje se vistude di strie la ricognòs a colp. Ancje parcè che no je masse diference!
«Bundì, ma saial che tal grop di whatsapp o vevi dit che ducj i gjenitôrs e vevin di vistisi di mascare!»
«E lu sai. Ma viodie, nossere o vevi prontât il gno vistît di Superman, ma o ai scugnût tornâ in fabriche e vuei buinore o soi vignût dret culì. Ma almancul, o soi rivât no mo?!»
No sa se crodimi, ma la rompibalis mi mole par lâ a tormentâ cualchidun altri.
O balini preant diu che a tachin la solite tiritere, cussì di lâ vie svelt.
Cui fruts, a saltuçâ come un dordel, no ti viodio Selmo, il pari di Thomas, vistût di Batman. Ma no ti vergognistu?! Passâts cincuante e ancjemò a fâ il macaco! Mi viôt e svelt o fâs il moto dal orloi e mi sposti viers la puarte.
In chel mê fie mi rive dongje cun la muse ingrugnide, compagne di chê di sô mari:
«Papi, stâtu migo lant vie?! E po tu vevis di vistîti di “Orso” come chel di Masha e Orso!»
«Eh tu âs reson stelute, ma no ai fat a timp, ma ti promet che la prossime volte… Orpo! Ve che la mestre us clame. Va frute, va cui tiei amîs. Sì, tal zuri! La prossime volte…»
E invezit no lu fasarai mai frute mê, mi diplâs. O larai ator dome che cu la mê muse. Parcê che jo no soi come cheste int achì. Jo o soi vêr. E no mi metarai mai nissune mascare.

di Michêl Londar (Sporting Brugnul)
#1163