CorseCurteZenâr#12 – Tane par Toni

#12 – Tane par Toni

Tal so lavôr di gjornalist, Dree an’t veve viodudis di mascaris, di chês dai politics, a chês de int di spetacul prin di lâ in onde… E al jere deventât un colezionist, tant che si jere jemplât la cjase di trofeus.
Si tacave za sunant il campanel sul nâs dal paiaç di IT, i mûrs a jerin plens di fotos, mascaris de Amazonie, presidents USA in resine, musis di len e tiere cuete, cjâfs di plastiche di robots…
Torzeon vie pal an, al tornave in paîs dome pe mascarade.
Si visave ancjemò cuant che la sô vicine di cjase si jere vistude di Lady Oscar, cusintsi lis medaiis e la bluse, e fasintsi i cjavei bionts di bessole, cun risultâts discutibii soredut pai cjavei, al pont che dopo e someave Elsa di Frozen.
O cuant che Massimo si jere vistût di Dotôr Spock, migo dome cu lis orelis a spice, al veve vistude ancje la sô Ape di nâf Enterprise, fate cussì ben che se nol fos stât pal motôr nancje il cjapitani Kirk in persone le varès ricognossude.
Ducj si visavin che timp indaûr il pancôr si jere vistût di brioche, e al veve fat vistî dute la famee, ognun di un tipo di pagnut diviers: il filon, la copasse, il pan al lat…
Doi agns prin al veve becât Pre Franco a saltâ fûr de canoniche vistût di Godzilla, nissun al varès mai podût suspietâ che al fos propit il piçul predi sot chel besteon, ma chest an il plevan si jere superât: lui e il muini a jerin i Blues Brothers e a levin ator pal paîs a dì a ducj: “O sin in mission par cont di Diu”.
Ognun insome al tirave fûr une idee gnove, fûr che Toni, vistût in tute, che al rivave ridint, cjoc e tirant coriandui.
“Bielis lis mascaris chest an, ce distu Dree ?” E i veve tirât une pache su la spale cuasit di rabaltâlu.
Dree al rideve fin aes lagrimis, parcè che al saveve.
Dome Dree, in dut il paîs, al saveve che Toni al veve za butade vie la sô mascare, e si visave benon cuant che le veve bussade, chê mascare, 10 agns prime, cuant che Toni nol jere ancjemò vignût a stâ in paîs, e si clamave Tania..