CorseCurteZenâr#11 – Il diaul

#11 – Il diaul

— E je opare di perdizion e di pecjât!
Cussì Pre Pieri al veve sierât la predicje, par pôc compagnant lis peraulis cuntun pugn su l’altâr. Ros in muse e cu la bocje che e tremave, al fumave di rabie, someant un turibul stropât.
Il plevan dal paîs nol sopuartave la gnove buteghe di Matilde, metude sù propit in face a la glesie e, a dispiet, screade juste la prime domenie dal mês. Il gnûf centri estetic al lavorave di continuo, clamant cetante plui int rispiet aes funzions liturgjichis. Si jentrave come une crodie, si saltave fûr une maravee. Miracul!
Fintremai che une sere la perpetue, sierant il porton da canoniche, e veve viodût saltâ fûr di une cise un strani om cu la muse verde e i voi scocolâts che la pontave cuntun racli a spiç. Prin di colâ svanide, e veve juste rivât a vosâ: — Velu il diaul! Velu il cjastì!
Tal zîr di une setemane lis robis si jerin ribaltadis.
La glesie si jemplave a ogni glon di cjampane e il centri estetic di Matilde si strissinave a fadie. Ducj a scjavaçavin la buteghe a larc, fasintsi il segn da crôs e disint jaculatoriis.
Di gnot, lis aparizions si moltiplicavin. Il spirt al spaurive ancjemò, cu la sô muse verde. La int, ingrumade in cjase, a scosolave rosaris e a brusave orâr par slontanâ la maledizion.
Matilde, dopo ve cjatât un barcon sledrosât cun parsore la scrite “buco dal inferno”, e veve frontât la cuistion. Sierade la buteghe e jere lade a messe, sentantsi propit sul prin banc.
— Dome cu la preiere o sburtarìn vie il demoni cu la muse verde! In curt al sarà vinçût!
Al mancjave dome un vosarili di stadi. Pre Pieri al jere deventât il guru che al varès liberât il paîs dal gnûf mostri.
Finide messe, Matilde e jere jentrade in sagristie, e intant che il plevan si gjavave la vieste, lu veve smicjât par ben.
— Ce biele piel, siôr plevan. No mi visavi une muse cussì slisse! Nancje che al fasès lis mascaris di arzile verde che o ai ta mê buteghe. Ogni tant però al è miôr cambiâ model se no la piel si ruvine!

di Massim Furlan (Sbreghebalon)
#1161

2 comments