CorseCurteFevrâr#11 – Paranoid alcaloid

#11 – Paranoid Alcaloid

1998 Istât. Matine.

Lûs mal di cjâf buinore un altri dì come ducj chei altris ma ce dì Madonute benedete Miercus o Joibe?! Il Nokia la svee che no sune parcè dulà isal il telefon a eco par tiere ma cemût par tiere? Par tiere ce strani no lu lassi mai alì che al sei jentrât cualchidun in cjamare o che al sei colât ce sucedial ah no dut ben mi à scrit Pieri.

-SMS-
«COPARI, GRACIE! VIN DI TORNÂ TA CHEL BAR LÀ DI FLAMBRI. DOPO TANT SCÛR MI SINT GNÛF O ALMANCUL PLUI LIZÊR. FIRMÂT RICIN SALVADI  ;-)))  ahah»

Tiri flât… o cîr di capî di impensâmi ma nuie. Ce sucedial no mi visi no mi pâr di vê bevût ce mi isal tocjât. Clami Pieri. TuTuTuu. Distudât. Torni a provâ. TuTuTuu. Nuie. Maladet rispuint! Mi jevi e o voi fûr, o miôr o soi fûr, mi lavi la muse un cluc di aghe lu spudi al sa di garp e vie! Ce calvari o ai di capî ce che al è sucedût… Pii il Pandin vie Puçui ma o soi masse incocalît… malon. Pii la radio “…la primavera è finita ma forse la vita comincia così…” la ruede e çoche il marcjepît voi a finî sù pe cise un rider in bici dibot al è muart amen intant soi za a Mortean… dentri in paîs passi in tierce Flambri km 3. Rivât. Clami Pieri. TuTuTuu. Ma dulà caz isal lât chel maladet parcè aial il telefon distudât e jo ca come un pipinot te place di Flambri. Chê ca me paie… Velu il bar… o miôr bar-edicule o miôr bar-edicule-minimarket, nuie di straordenari suaze agricule Friûl di mieç parone ruspiose.

“Bundì siore”

Odôr di bago doi vecjos carampans comentin ingobîts i muarts dal Gazetin. Ma viôt ce biele cort ca di fûr o tiri une biele bocjade di aiar lis cjadreis di plastiche Algida un taulin mi senti e o cuchi ator. Ca il timp si è fermât: curtîl come une volte imprescj seglot forcje. Vuarzine ruzine. Dut in regule. Pulinâr. No ma spiete un lamp! La piergule e à alc di strani… ma clâr e je Datura Stramonium in rose che si ingripigne sù sul tet. Spetacul râr vididule velenose sfloride puce di smusar.
“Alore… cemût lu bevistu il cafè? Sclet o ancje vuê coret Stramonio?”

di Rudy Citòs (Borussia Dordul)
#1186