CorseCurteFevrâr#09 – Edelweiss

#09 – Edelweiss

La vite i veve simpri dât di mangjâ, e pûr la sô anime ogni tant e pative di malnutrizion.
Si cjatave cence pari e cence mari e in piês l´ambient che la circondave al jere propit ostîl, scjars di stimui positîfs par restâ. Considerant che e veve une impussibilitât fisiche par partî, che e jere nassude propit li, in cuote, dulà che la viste e jere une fotografie di calendari ogni dì, ogni stagjon al someave propit che chel puest al sarès stât la suaze de sô esistence par simpri.

E jere a stâ intun borc di mont che al stave par sparî, ogni dì si figurave la imagjin di un modon che si sdrume. La industrie locâl, che e veve dât di mangjâ a cuasi ducj par agns, e veve sierât di pôc, e di chel progrès dome a restavin l´aiar contaminât e lis aghis no masse netis. Intun mont di relazions e vivuçave benissim di bessole duncje il dispopolament nol rapresentave un probleme. Di tant in tant la imagjinazion le judave a lâ indevant, l´astrat dal pinsîr al jere un argagn une vore doprât par scjampâ di un ecosisteme ogni volte mancul ospitâl.

A ingredeâ la ace so pari al jere un om no cognossût e sô mari e vignive considerade mieze strie. Tant che in chel piçul gjalinâr a jerin liendis in merit ae sô origjin che a vevin dât puest a detulis dulintor. Al vignive palesât che e jere colade dal cîl tant che là sù no le volevin plui, si che duncje i vevin metût Stele par non. Une altre liende e indicave che sô mari e jere une strie ermafrodite e par chel il pari nol veve reson di jessi. Par finîle, un altri filon al segnave che so pari al jere stât un cramar todesc colpevûl che ogni tant e vignive nomenade Edelweiss. Dutis robis di piçul borc.
E jere propit dongje a jentrâ in crisi pe sô vere identitât, e veve bisugne di capî cui che al jere stât so pari e di meti blanc su neri lis liendis che a ziravin tal borc. Al fo cussì che si rivolzè ae sience par capî la sô divignince.
Cuant che la rispueste e rivà e restà sbarlufide. Jê e jere une stele, une stele alpine.

di Lenart Gjavedon (Scalembrut)
#1184

2 comments