Lu savìn che lu savês ma i tignìn a fâusal savê une volte in plui.
Ce robe? Che Contecurte e rive simpri a jentrâ te Panarie, e no par robâ la mangjative, ma par insiorâ un pôc ancje la cjarte, metint adun il so cjantonut te storiche riviste trimestrâl di culture furlane.
E vele chi, che us mostrin la jentrade dal Ostîr de ultime Panarie dal 2020, che come par solit e je stade insiorade e metude a teme di Nadâl e che dentri o cjatais ancje cualchi dissen a compagnâ lis contis.
Insome… po dopo, voaltris di Contecurte, nol è di sigure par il nestri cjantonut che o vês di lei la Riviste, ma parcè che dentri o cjatais une vore di robis. Cualis? Ve chi… Alore… un piç di teatri, une vore di articui sui libris, un pocje di storie, di art, ma ancje gleseutis, cinema, cjistiei… cun articui di une sdrume di biele int (W. Tomada, M. Turello, V Zucchiatti, F. Bosco, R. Beano, S. Paroni e tancj altris…)
Insome… se o vês voie di dâ une man al progjet, che come ducj i progjets di culture al è in dificoltât e ancje di lei un pocje di robe (pe plui part par talian, eh) ve chi, lait a cirî la Panarie, che cun di plui o cjatais ancje un articul dal nestri Ostîr dulà che al disvele ducj i segrets di Cryptofriûl!
