CorseCurteZenâr#07 – Zirâ jenfri la int

#07 – Zirâ jenfri la int

A jerin agns che no i capitave di sintîsi cussì. Malcuiete e un tichinin avilide. Un pinsîr gnûf al veve nassût di bessôl: polsâ par un moment, cjapâ timp dome par jê.
Ma ce fâ? Dulà lâ? Dilunc dal an, dome a Fevrâr e Otubar e podeve permetisi di zirâ jenfri la int. Ridi cun lôr, fâ matetadis cence jessi ricognossude vistude dute di neri, cun chel aiar gotic che cetant i plaseve.
Cheste volte e podarès lâ in Sudameriche o in Europe. Une sielte pardabon intrigose… cjalt e ligrie o gale e frêt?
Si jere decidude par Vignesie, parcè che ancje jê a voltis e podeve jessi avonde snob. Se daspò i vanzave ancjemò il timp, e podeve fâ un salt a Rio de Janeiro. No mo?
Al mancjave cualchi dì ma a jerin ator cubiis di mascarâts cun chei vistîts dal Siscent venezian che si fasevin fotos a bracecuel cui turiscj. Te place San Marc al jere pardabon un concert plen di int!
Cuant che e vignive in citât, si platave intun cjanton scûr sot un puarti, e dome si lassave viodi di pocje int, chei juscj. Ma cheste volte e sintì une eletricitât tes pontis dai dêts, no podeve molâ di movi i pits cun la musiche, no voleve jessi plui cussì platade! Cence podê spietâ e cence un fregul di tristerie, si jere butade jenfri la int cu la ment vueide. E tocjave chest e chel altri, simpri in moviment, simpri plui svelte.
Cualchidun al rideve cuant che le viodeve, altris no podevin crodi ai lôr voi. E partì a jessi sui sociâls, ducj a fevelavin di jê. In tancj a vevin scomençât a vê verementri pôre, ancje cence viodile. Ma al jere pluitost tart, no veve plui ce fâ cun cheste citât.
I coventave lâ vie, a Rio de Janeiro. Une citât cun plui int, plui strets, come che a jerin usâts lôr a fâ fieste. Di sigûr e sarès stade ricevude cui braçs viarts, chei brasilians sì che a savevin vivi!
Ancje se vuê in dut il mont a zirin i mascarâts ancje di Istât, ta chel an il Carnevâl al è stât cancelât, dapardut.

di Noemi Salva (Passarute)
#1157

1 comments On CorseCurteZenâr#07 – Zirâ jenfri la int

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît