CorseCurteZenâr#05 – Il Ros e il Neri

#05 – Il Ros e il Neri

Maladete chê idee di une serade in mascare! Il gno locâl al lave ben, fin in chê volte. Sul fîl de leç o cuntun pît fûr: o vevi une sale-roulette e la polizie e sierave un voli, mi vevin lassadis des fotos segnaletichis e o vevi di visâju se al capitave cualchidun che lôr a cirivin.
Ma chê sere di carnevâl! Serade in mascare, tancj dai clients plui curients mi le vevin domandade, no podevi dîur di no. Chel de polizie che i vevi mutivât, al veve stuarzût il nâs, ma…
Al pareve dut ben, nissun incident, bon il vuadagn.
Ma intal doman no mi rivin doi de polizie! A volevin viodi i biliets di 50€ che o vevi incassât cu la roulette, ma ju vevi za puartâts in bancje. Aial notât nuie di strani, no, no, dut normâl, cualchidun al à vinçût altris pierdût, ma no robis gruessis. La pontade plui alte? Mah! Salacor une di 50.000, anzi dôs, il croupier sai visave, a jerin in doi, un Arlechin e une Columbine, e une pontade cussì alte i parie normâl? Ben no, però… Però ce? Però al jere un zûc jenfri lôr doi, un al vinceve e un al pierdeve. Valadì? Valadì che un al pontave sul neri e un sul ros e cussì ur restave simpri chê cifre. E isal sigûr che a vedin fat chest zughet une volte sole? Mah… sì, mi pâr… saio jo!
– Ah.
– E, naturalmentri nol sarès in stât di cognossiju, chescj doi simpaticons, no mo?
– Eeeh, no veh, in mascare…
– Ah.
Un dai polizais al tire fûr un biliet di 50, nus mostre il numar di serie.
– O varês sintût, no mo, dal secuestri di chel frut?
– Ben, sì.
– I gjenitors a àn paiât un riscat. Cun biliets di 50. Nô ju vevin numerâts, un par un. Un siorut, vuê a buinore, al è lât a paiâ une fature in bancje e un dai biliets al veve un di chei numars, lui al è colât dai nûi, e nus à dit che al jere culì usgnot passade e al à vinçût uns mil euros. Chest chi al è il so biliet, al è un di chei dal riscat. Come che a jerin di chei dal riscat ancje ducj i mil o doi mil biliets che i vuestris Arlechin e Columbine a àn lavâts nossere chi dentri!

di Laurin Zuan Nardin (Lupusinfabula)
#1155

4 comments