CorseCurteZenâr#04 – Cence dint

#04 – Cence dint

Si viodè une vore brute, dongje de sô amie, biele, cui cjavei clârs e i voi tant che il cîl di plene Istât. Jê, invezit, e veve la strece, lungje e scure come la code di un cjaval sburît. No rideve, no podeve ridi. I mancjave un dint, devant. Dopo che al jere colât, nol cresseve. E sì che e veve tredis agns. A rivavin i fantacins, la sere, dopo rosari. Jê e la sô amie a vignivin fûr di glesie, a smicjavin se a jerin, e po, si platavin. Jê no voleve fâsi viodi par no vê ocasion di ridi e di fâ viodi chel bus neri, come un gnotul invuluçât. La sô amie i faseve companie, ancje se e sarès stade seneose di fâsi rimirâ. Indevant dal spieli, Lussie – chel al jere il so non – si cjalave un lamp e po e scjampave. “Ce brute che o soi” si diseve, vaint. Cussì, i voi si sglonfavin e, brutute, e deventave pardabon. Lussie e lave simpri a cjatâ Teresie, une vecjute dal so picjul paîs. In chê dî, i veve contade la sô avilision. Teresie le scoltave, cidine. «No sta preocupâti, ninine. Se cualchedun ti vûl, ti cjape ancje cence un dint». «Magari, cui vûstu che mi vueli, cussì brute». «Sai jo cemût che tu âs di fâ. Vonde tignî la man devant de bocje. Tu âs di meti la mascare e ridi, ridi come se il dint al fos culì». E varès volût crodi a Teresie, e faseve lis provis devant dal spieli, ma … Diu, ce brute. Il bûs al sameave un puarton, neri come la gnot cence lune e grant, a gloti ogni ilusion. Pense che ti pense, chel vinars di fin Mai, Lussie e la sô amie a vevin decidût di saludâ chei fantacins. «Mandi» e disè Lussie a chel moretin cul motorin plui rusin che piturât. «Mandi, Lussie. Sâstu che tu sês biele?» «Cui, jo? Cjale ben, mi mancje un dint devant». E, cence necuarzisi, lu veve fat viodi e, lui, al scomençà a ridi, a ridi, intant che Lussie e sbassave i voi. I sbrissave par fin di vaî. «Ehh, bon, no mi jeri nancje necuart, jo. Un dint si met, ce vûtu che al sedi. Tu mi plasis ancje di plui, cussì». Par merit dal dint – e de mascare – Lussie e Pieri a àn fat fieste e mieç secul di matrimoni. Propit chê altre dì!

di Pierina Gallina (Gjaline Padoane)
#1154

1 comment