CorseCurteZenâr#02 – Parincis

#02 – Parincis

Une man i sbassà la cotule sul flanc, daspò si poià a plen suntune clape. Milla e sintì frêt, pluitost che il cjalt di chê manate viziose, ma e riduçà. E scugnive sopuartâ chel “tocje e cerce” ancjemò par un pôc, prime di viodi la cjarte dai bêçs sbrissâ fûr dai lustrins dal costum. Al rivà un altri, tracagnot e spelât, ch’al puçave di stale. Milla e stratignì il flât par no dâ di stomi e si zirà viers di lui cun malicie studiade.
Dut un colp un campanel al sunà e jê si smolà un ticut: e podeve lâ, cumò, e jere la ore de lap dance.
Gjavât gjachete e scarpis, e montà sul pâl cuasi crote, dos rosutis su lis tetis e un pindulit di lustrins e chês mudandutis che i taponavin a pene devant. E balà come une étoile, graciose e bielissime. Tal so cjavut a tornavin lis lezions di balet classic che e veve cjapât a Kiev cuant che e leve a scuele, e il doman al someave une robe sflandorose dute denant di jê.

Sentade suntune cjadree cuvierte di un vilût che nol veve plui colôr, dentri di une stanzute che a vevin clamât camarin dai artiscj – chê scrite e jere marcade su la puarte cuntun penarel blanc dentri di une stele, ancje chê blancje – Milla e scomençà a gjavâ vie lis ceis fintis, il tupè di cjavei riçots, a netâsi di dute la malte che e meteve sù par lâ in sene. Par ultim si lavà la muse cun aghe e savon e daspò e metè sù la tute e lis scarpis di gjinastiche. Cuant che e finì, e saltà fûr pe puartute di daûr. Nissun al varès mai dite che e jere le stesse frutate che e striave i oms dentri dal night.

Inte cjase al jere dut scûr, ma jê e saveve a memorie ogni cjanton. Il picinin al durmive cul dêt in bocje; une bussade sui cjavei e vie tal jet. Ancje Mario al someave ch’al durmìs. “Cemût stavie le vecje usgnot?” i domandà intant che si svistive. “Benin. Sô fie mi à dât i bêcs de setemane, e son tal tiret intal ingrès.”
“Tu sês une brave femine, ven chi che ti scjaldi, cuissà cetant frêt inta chê cjase di carton!”
Si tirà dongje e si lassà strenzi cui voi bielzà sierâts.

di Silva Ganzitti (Copasse Blu)
#1152

2 comments