Ispirazions par Pôrecurte – folclôr furlan

Lis figuris dal folclôr furlan classic

O vin gust di scomençâ la preparazion al Pôrecurte Day 2021 cun chest articulut che us fasarà une piçule liste des figuris plui classichis dal folclôr furlan, che a comparissin bielzà in tantis flabis e liendis, e che a podaressin jessi dopradis par scrivi une conte curte in teme cul nestri event.

LIS AGANIS

Scomencin cu la figure forsit plui cognossude dai furlans, che e je sparniçade, in veretât, in tantis altris bandis de Italie e che e cjate il sô corispetîf ancje di là dal confin (clare, plui tristis). A son spirts di aghe dolce, che par la plui part a cjapin la forme di feminis. Di spes a son zovinis e bielis e vistudis di blanc, ma a podin jessi ancje vielis, se pûr simpri une vore ferbintis e ativis. Si lis viôt di gnot – miôr se tal clâr di lune – dongje dai riui e dai torents, e di spes a son buinis, protetoris dai pescjadôrs, ma a podaressin ancje jessi tristis. Cualchi liende e conte che a àn insegnât a lis feminis a lavorâ la lane e ai oms a fâ il formadi. Cuant che a son tristis a podin ingjanâ cul lôr cjant e fâ inneâ la int ingropant i pîts cui lôr cjavei. A proposit di pîts, in cualchi version, ju àn voltâts par contrari e cuant che a corin daûr a cualchidun, par no inçopedâsi, a butin lis tetis daûr des spalis. Ae fin, cundut di chestis diferencis, aghe dolce e ambiguitât a son i elements che lis caraterizin di plui.

SALVANS

Se lis Aganis a tant dongje de aghe, i Salvans a son spirts dal bosc. A son figuris che a comparissin in tantis formis e in tantis version ma ce che lis tire dongje dutis e je la lôr vicinanze a la nature e al spirt plui pûr e agricul dal om. La liende e volarès che a fossin i prins abitants di cheste tiere, parâts vie cuant che al è rivât l’om. Cul lâ dal timp, lis lôr carateristichis di creaturis ospitâls  e pacjifichis a son stadis sostituidis di chês plui peadis al lât negatîf. Al salte fûr che a son figuris pelosis, furtononis e tristis, che a copin e mangjin i oms. E je ancje une liente cjargnele che e conte di cemût che si è rivâts a copâ l’ultin Salvan, golôr di vin. In ogni câs, dut chest che si conte, al è dificil di mostrâ, parcè che la lôr carateristiche primarie e je di jessi sforadis e misteriôs. Dificil viodiju, bogns o triscj che a sedin.

PAGANS

Une figure cetant antighe e cetant smenteade e je chê dai Pagans, che si cjate in cetantis culturis e si pues definile come “om salvadi” (o femine). I pagans a sasressin propit figuris di umans scjampâts ae umanitât, che si platin tai forans e tai gatui de mont e che, plui par nature che par tristerie, a podaressin jessi agressîfs cuintri l’om civilizât. A sorevivin in cetancj cognoms e in cualchi toponim e si cjatin in cualchi liende (l’om des cjadenis, di Vinadia, al podares jessi un pagan). Tra lis plui cognossudis chê su lis paganis, che a jerin stadis freadis de astuzie di un om e che i veve robât dute la massarie. Par altri, a son propite lôr, i pagans, che a robin la robe dai paîs…

SBILFS E SPIRFOLETS

I sbilfs, di no confondi cui nanui, a son ce che par talian si clamin “folletti” ma a si puedin cjata di tancj diferents, regalant un univiers di figuris dulà tocjâ la fantasie. A metiu dongje ducj e je la lôr indole zuarine e il lôr jessi sforadis. Par solit a si cjatin in Cjargne, e par solit tal bosc plui bas, ma no je dite. Si àn testemoneancis di sfilfs un pôc dapardut e a son di chei che a condividin l’ambient cul om, vivint tes stalis e tes cjasis. Par solit a son bogns, e si limitin a fâ dispiets, ma jessint in eterni fruts a àn i stes difiets, ven a stâi jessi capriçôs e inrabiâsi par dibant. Si che duncje… miôr stâ atents. Lant a viodi plui tal detai, o cjatin i Guriuts, che ur plâs lâ a robâ tes cjasis, o i maçarots, che invezit a lavorin intal bosc (ma ancje lui, par fâ dispets… par no cjacarà de femine, che a For a clamin Ridusela). E dopo, slargjant la voglade, ve che o cjatin il Licj, che ti ingrope la robe, il Braul che te discûs, o il  Bagan che ti rabalte i seglots o ti plate i imprescj… Ator dai sbilfs, insome, forsit no si rive a fâ sù tantis storiis di pôre, ma che a sedin creaturis straordinaris e cun tancj contats cul l’om al è clâr. O metìn dentri di cheste categorie ancje dai spirts pôc racomandabii de slavie furlane, ven a stâi i Scrats. A son creaturis, ancje mieç om e mieç bestie, che a vivin par solit tai boscs, vuardeant un tesaur (carateristiche comun ai Guriuts), e miôr no cirî di robâial. Ma chest al è dome un elenc fat di presse, parcè che se o vais a sgarfâ o cjatais ben altris figuris (il Pamarindo, il Gyan, il Grandinili, il Boborosso, Il Pavar…)

GJATE MARANGULE

E je une figure ecuivalente al “gatto mammone” o in gjenerâl une bestie che si podarès paragonâ al plui innomenât “lupo mannaro” (No, no a Lupo Manarie). No si sa masse, ma si pues dî che e sedi femine, malegraciose, e che la gnot al sedi il so timp e che si puedi cjatâ rimpinade sui arbui. Di sigure, se un frut no si compuarte ben, a pues vignî jê, grandonone, a puartâlu vie.

ORCUL

Il plui innomenât al è di sigure l’Orcolat, che al è chel che al à fat vignî il taremot, tant che la peraule Orcolat e je deventade sinonim di moviment sismic. Ma in bande di chel, omenons bruts, grancj e trist, ator pes storiis dal Friût, a son simpri stâts e di sigure cualchi conte sul orcul ducj la vin za sintude. E je une figure une vore frecuente in dutis lis culturis, ma in Friûl, là che il vivi di bessôi e lontan dai altris oms, no simpri al è un disvalôr, l’Orcul al pues jessi ancje bon. Di sigure, però, nol à un bon rapuart cui fruts, vint la tindince a… mangjâiu!

IL DIAUL, ATILE, LA MARI DI SAN PIERI

O citin, par sierâ lis nestris ispirazions, ancje chestis trê figuris. Il diaul, no covente spiegâ cui che al è (o cui che nol è) ma in Friûl la so figure e je dispès clamade dongje tes liendis e tes contis. Trist, par solit, al ven bigulât de astuzie umane o dal intervent dal Signôr; al capite però che il Diaul, robe che no sucêt in dutis lis culturis, al sedi just, si no, adiriture bon. Atile, il flagjel di Diu, al jentre in tantis liendis (une su dutis, chê dal col di Udin) e la so figure e je sì di tristerie e fiscaments, ma ancje di fuarce e valôr. La mari di San Pieri, invezit, aromai e je cognossude soredut par une carateristiche: la invidie.

STRIIS E BENANDANTS

Achì, la leterature in proposit, e je pardabon grandonone. Si limitin a visâ che a esistin e che se un al vûl metisi a cirî alc, nol à che di fracâ cualchi boton o tirâ fûr cualchi libri.

LIS TRADIZIONS DE VILIE DAI SANTS

Su chest, al è tant ce di, dal cjadin di aghe, a la lûs fûr de puarte, a la sêt dai muarts, ae procession. Us mandin però al articul di Carli Pup, che lis struche dutis in pocjis peraulis. Al reste, insom, che un dai sogjets miôr par scrivi contis di pôre, a son propite lôr, i muarts, che in Friûl a àn vût simpri une grande impuartance te vite dai vîfs, sedi tai ricuarts, sedi tant che fantasimis.

2 comments