Pieri no si cope

La sclope e jere za masse strache. Che la prime vuere, ce che al finive cun dutis. Daspò la seconde. E vignive di prime ancjemò: unificazion, confins e vie indenant. E ancje Pieri al jere strac. Le veve tignude di cont da cuant che e jere stade fate intune fabriche in Austrie. Simpri cirint di stâ denant de famee, se al ves di tocjâi di doprâle. Al jere il so dovê. Ma il timp dai inmagaments e des tradizions al jere finît. Cumò a jerin gnûfs mîts. Plui terens. E lui al veve voie di polsâ un ninin. Un o doi secui par mût di dî.
“Be po, ben. Alore jo o sai ce fâ”.

“Al sarà come lis cocis sbusadis, cjapant il puest dai cjâfs, che in altris timps a si picjavin sui pâi par spaventâ lis tribù nemiis”. Pieri al à sistemât la sclope cun cualchi striament e rituâl par fâle colâ dentri di un toc di fiers vecjos e vanzums di vuere destinâts ae fondarie.

Di dut chest, nome lis moleculis da la sclope a son scjampadis inte alte atmosfere, lant a cirî robis gnovis e gjoldintlis par Pieri.

Une part di lôr e je colade vicin di un set di cine. A son restâts li fin tai Setante, cuant che si àn depositât e metût parsore di un revolvar di sene, di chei che a no son par copâ, ma dome par divertîsi. Al è stât doprât par un venezian che si clamave Mario, ancje se la cjadree dal set dulà che si sentave e diseve Terence e lui al veve intor vistîts di cowboy.

Une altre part e stade puartade lontan dai vints. Coladis di chê altre bande dal mâr, si son fissadis intune celuloide dai agns ‘40 in blanc e neri che e mostrave trê çondars graciosissims che a sbaravin cuntune sclope che e butave fûr no proietilis ma une bandiere cun la onomatopee “¡Bang ! ”.

Altris a son finidis in dissens di pipinots, dulà che al jere un coçon ancjelui  cuntune sclope che simpri al jere daûr di cjaçâ une raze nere e un cunin, ma lis sclopetadis no i fasevin nuie, parcè che a jerin pipinots.

“Be po ben. Dutis lis moleculis par fortune a son rivadis in puescj dulà che il ridi e il sviâsi a gjavin fûr dute la violence, no come i agns passâts cuant che e jere une sclope. Par cumò jo o ai finît. Mi metarai vie intun bus da un vecjo arbul fin che a vegni chel timp in che mi tornin a clamâ”.

Intal 2012 Pieri si è sveât cuant che a sintût un cjantê dal so cjapiel dut ros.

di Zorz Cersaratto
#1100

Conte jessude dal laboratori Anatomie di une conte

1 comment