De valîs di carton al notebook

Prospar al jere rivât in chestis tieris te decade dal ‘30 in cercje di fortune cuntune man denant e chê altre daûr: la drete le doprave par sostignî la mantie de valîs di carton, e la çampe le veve daûr de schene, come sburtantsi par dâsi coragjo. La valîs e jere pesantute: in bande di cualchi mude di blancjarie, al veve la cassele dai imprescj.

Di mistîr al faseve il marangon, al saveve lavorâ il len come se al fos arzile, al tirave fûr des formis une vore singolârs, graciis al snait che al veve tal azionâ i imprescj. Al jere un che al saveve un grum, i bastave cjalâ e nulî un toc di len par savê se al jere maleabil o mancul.

Prospar al fasè onôr al so non, se ben che al rivà come che si dîs, tal moment e tal puest just, la sô voie di lavorâ, judade cuntun spêl di fortune, i de la olse che i coventave par rigjavâ profit des miôr cundizions de mobilitât sociâl che il puest al ufrive ta chei agns, permetintji di rivâ a sei un imprenditôr di esit tal so setôr, rivant a vê e a ocupâ une buine posizion.

Al veve ancje une cjase rurâl. Li al riceveve i amîs, ju puartave a fâ un zîr pe proprietât, al finâl ju menave intun cjanton dal parc, li al veve tirât sù une sorte di altarut, parsore di une  lastre di marmul e daûr di un veri, si podeve viodi la stesse valîs di carton rivade cun lui cuarante agns prime, cun dentri la casele dai imprescj che, ben uçâts, a someavin gnûfs.

Braurôs des sôs origjinis, Prospar nol pendolave tal contâ ai siei ospits lis propris vicendis, nol voleve dismenteâlis. Cualchidun al dîs che il presint si po spiegâlu cul passât: di sei cussì, la valîs di Prospar e jere leade ae sô prosperitât.

I Prospars emigrants di vuê a son te lôr grande maiorie zovins scuelâts e ben preparâts, imprenditôrs  dispuescj a cori dai riscjos e a trionfâ. A emigrin convints di vuadagnâi al futûr, za che il marcjât dal lavôr tal lôr paîs no ju sodisfe dal dut. E la tant cumò dispreseade valîs di carton dai secui disenûf e vincj, in dì di vuê e ven sostituide cuntun Notebook di ultime gjenerazion.

di Galliano di Buenos Aires
#1101