Regâi di Pasche

Ogni an, cuant che la Vierte e scomençave a cucâ, jo e une mê amie si davin une man a smondeâ di cjâf a pîts lis nestris cjasis e par solit lu fasevin sot Pasche. Jê e jere a stâ dongje di cjase mê. Chê dì mi spietave par meti in muel i tendons, ju vevin za tirâts jù e metûts tal apartament di sore. Dopo vê cjolt un cafetut insiemi, o ài cjapât lis scjalis e cu la clâf in man o ai fat par vierzi la puarte, ma la clâf no zirave te sieridure, prove che ti riprove ma nuie di fâ.
– Orpo – o pensai – mi à dât la clâf sbaliade.
Cussì o tornai jù a spiegâji la robe
– Ma no e je chê juste torne a provâ
… e sù pes scjalis di gnûf a remenâ te sieridure, ma nuie di fâ.
– Rose vûstu capîle o no che la clâf e je chê sbagliade!
– O ven a viodi jo spiete li – e intant o levi indevant a provâ e di bot no sai se o ai mot la clâf ma e à scomenzât a zirâ, la robe mi puçave par vie, che fin chel moment no si jere mote par nuie. O sburtâi un tichinin la puarte, ma sintintle dure le pocâi cun dute le fuarce, no lu vessio mai fat, di daûr al saltà fûr une rugnade ch’a no veve nuje di cristian. Dute scaturide mi metei a zigâ: – Chi al devi jessi un! Al è un daûr la puarte! – businant come une mate o sciampai jù pes scjalis. Rose tal sintimi a berlâ e scomençâ a fâlu encje jê e e diseve: – Esial muart, esial muart? – Al saltà fûr un davoi de madone e par vie che i barcons a jerin spalancâts la trombe des scjalis e rimbombave come no sai ce. Si scontrarin dutis dôs te jentrade di sot, juste in timp par viodi l’om di Rose che si presentave su la puarte dal bagn dut scaturît, ancjemò cui bregons jù pes gjambis, e par che no i colassin ju ingrampave cu lis mans. Pe ocasion i jerin vignûts i cjavei drets, i voi spiritâts, la muse zale come un limon e di ca e di là dal nâs dôs strizzulis verdis. Tal viodilu ta chel stât, dal zigâ i passâi al ridi, ma mi molarin lis sgjambis colant par tiere tant lungje ch’o jeri. Intant Rose, in bande di me, a çavarinave.
– Mi ven mâl, cjapaimi, cjapaimi mo! – Si rimpinave sù pal mûr e mo sù pal temosifon, po e pensà ben di colâ par tiere dongje di me. Il siò om nus cjalave instupidît e al diseve: -A son matis! Magari cussì no, a puest no son mai stadis, ma cumò a son ladis fûr cul gamelot!
Cuant che i rivarin a dâ di ca i spiegarin il dut, parsore al jere di sigûr cualchidun stant che il lôr fi al jere lât a scuele e la mari lu veve viodût a lâ vie duncje!
– Mah.. – al diseve il siò omp – Cui sa se ch’o veis sintût
– Po ben lin a viodi – i disè Rose, ma lui no si moveve.
A un ciert pont jê e cjapà il telefon in man disint
– O soi scaturide! Cumò i clami i carbinîrs e cussì i vedin!
– In chel si sintì come a talpinâ e dôs scarpis di gjinastiche a planc si moverin pes scjalis. Dut macolât pe strente cjapâde daûr de puarte si presentâ Tizian, il lôr fi, cul cjâf bas par vie che ce ch’al al veve imaneât i jere lât dut stuart. Cualchi ore dopo l’om de mê amie si metè tal jet cuntune coliche di fiât, il miedi al disè ch’al jere il risultât de pôre ch’o i vevin fat cjapâ cul nestri berlâ.Poben chel al è stât il regâl che ta chel an, al à cjapât par Pasche!

di Marisa Gregoris
#1074