Incuintris…

Dut al scomençà une serade di Dicembar. Basili si jee intardât te cjaminade che al faseve prin di cenâ. Cjalant il cîl si maraveà  viodint i cambiaments cromatics, dome la palete di un pitôr e varès podût comparâsi a chel event.

Di bot si fasè gnot fonde, scure, dut si fermà, no si moveve nuie, no si sintive nuie, la calme si jere paronade di chel istant, che se pûr curt i parè une eternitât. Ancje lui nol olsave nuie. Al sierà i voi, cuant che ju vierzè nol podeve crodi…  il firmament si jere jemplât di puntins colorâts, man man che si svicinavin si ingrandivin lampant e cimiant risaltant chê strane scuretât. Fintremai che, molant fûr cuatri talpis, a forin cjapant sît sui prâts dulintor.

Cuasi fasintjur tet e aparì une lus grandonone, intun baticei dutis chês altris cimiadis si distudarin. E ve achì che dal grant anel cun luminosis barconetis e vignì fûr une lungje scjalinade che e scomençà a jemplâsi di int premurose e a sbassâsi. Cuant che a tocjavin tiere, i voi di Basili no podevin dâ credit… ju leve ricognossint, al ripeteve i lôr nons, ducj i jerin familiârs… Ognidun di lôr lu ripuartave indaûr tal timp, si viodè frut, fantat, om, cun ricuarts di curtîi e di contradis, di viaçs e di lengaçs foranis che i faserin sît inte gjostre de vite… dulà che al sun di musiche al  scomençà a zirâ come un trotul… mo aculì… mo aculà… e mo culavie.

Cul pas dai agns la gjostre si fo ralentant, la vecje melodie dal gramofon e sgrasaiave, la pontine bielzà fruiade,  zîr daûr zîr e vierzeve cumieris.
Un flocâ cidin lu sveà di chel pisul sot dal vecjo cjastinâr, al cjalà intor, nol jere cambiât nuie, in ogni câs, Basili al sintive un cambi strambalât dentri di lui.

Al cjaminà viers cjase, al veve pierdût il sens dal timp…  di lontan si sintivin glons di cjampanis… al le daûr di lôr… I fedêi a saltavin fûr des viis e des andronis, il Dom di Sante Marie ju spietave pai Madins.

Al rivà tal sagrât… l’orloi dal cjampanili al bateve lis oris de miezegnot, i ricuardarin la sô vite passade. La glesie e jere colme… une vôs fuarte e clare e intonà il Glorie, ducj i faserin eco…

Pôc a pôc e come malvulintîr, la int e scomençà a lâ vie, lassant Basili di bessôl.

In pôcs istants dute chê compagnie si fo pierdint jenfri il cimiâ des stelis.

di Galliano di Buenos Aires
#1080

1 comment