I triscj #3

Il sbalç fra dentri e fûr, mal visi ben, al jere impuartant. Viodude la ore no jere nancje di maraveâsi: la une di matine. Dentri dal salon si sudave ancje cu la cjamese, cun dute chê int ch’e saltave e ch’e sgurlave su la piste; difûr il flât s’impanive a ogni respîr. Come nuie che cussì sudât o varès podût cjapâmi alc! E la colpe e jere dute de mê femine Juliane, ch’e veve simpri chê di balâ fin sul ultin. No int veve mai vonde.
Nol sarès stât nuie di mâl, in fin dai fats, se nol fos che a mi propit no mi plâs balâ. No lu sopuarti! E par Juliane al pareve che nol fos altri tal mont. No us interessarà, ma lis vevi provadis dutis par disviâle di chê, crodêtmi, e dut cence costrut. E chê dì o vevi decidût ch’e jere ore di fâle finide.
A pene montâts tal auto jê si veve gjavât lis scarpis, come simpri, e veve sbassât un tic il fignestrin e si veve metût a pisulâ. Come simpri. Cumò, s’e je une robe che dabon no sopuarti tal auto a son i fignestrins sbassâts. Che jo o patìs une vore i zîrs di aiar. E chel aiarin frêt ch’al vignive dentri e che mi rivave te cope sudade nol podeve che fâmi mâl. E po, no par dî, ma un tic di compagnie e varès ben podût fâmal impen di pisulâ.
Mi pareve che no mi ves nancje sintût cuant che, cualchi dì prin, i vevi contât dal câs dal gno amì Duili: un cenglâr i veve sdrumât dute interie la flancade dal auto, propit su la strade ch’o jerin nô, e la sô femine, che i jere dongje, e jere in fin di vite tal ospedâl.
O sai ch’o pensarês mâl di me, si capìs, ma jo no int podevi plui. L’idee mi veve balinât tal cjâf intant che i contavi la storie. E je dute fodrade di arbui la strade par tornâ cjase dal bal, platins vieris e tressâts: une biele strussade de flancade dal auto de bande di Juliane cuintri di lôr e di sigûr no sarès vignude fûr scapule.
O sai, o sai, ce ch’o volês dî. Ma si fâs prest a judicâ, crodêtmi!
E jê, salacor dome par fâmi dispiet, come ch’o vevi tacât a stazâ cuâl ch’al fos il puest miôr si veve tirade sù e e veve tacât a cucâ fûr, nancje che mi ves let dentri dal cjâf. Po, dut un colp, si veve scrofât jù, come a cirî alc sul tapedut. Chest al è il moment plui just, o vevi pensât: in chê posizion il colp al sarà devastant. Ma prin ch’o rivàs a mandâ l’auto bande i arbui il veri di denant si veve sbridinât a colp e un ostrighe di modon mi veve pocât juste tal mieç dal cerneli.
Si fâs prest a judicâ, lu ai za dit. E prime ch’o tacais a coionâmi o vês di savê che juste prin che il modon mi cjapedi in plen o ai lampât un trat la muse dal om ad ôr de strade che lu veve tirât. E me visi, oh se me visi.
Ancje parcè ch’e je la stesse che cumò, dì di Ducj i Sants, e compagne Juliane intant che mi poie une rose dongje la fotografie picjade tal marmul.
Si fâs prest a judicâ. Si fâs prest.

di Gianluca Franco
#1077

1 comment