Tal curtîl

Nô fruts, a pene ch’al rivave un pôc di clip, o jerin ducj te place de glesie che e confinave cun tancj curtîi, li si podeve viodi, sintî e lis marîs a podevin ancje tignî di voli il nestri zuiâ. Cussì, chel dopo di misdì, o gjoldevin chel fregul di clip stant che il frêt al stave lant pes curtis. De bande di Cjamin, a planc, cu la biciclete che e scartave, al rivà il puestin: in chel timp la pueste normâl e rivave tal dopo misdì. Si fermà denant a une des cjasis, al veve une cartuline in man e al clamà fuart par ch’al vignis fûr cualchidun.
Difati si presentâ la Mariute che e jere la parone di cjase, cjapade  la cartuline i de une cjalade e po e clamà siò fi par dajile. Chel al vignì a smirâle di dongje di nô che, curiosonis, a tiravin i voi. Al jere il ritrat di une biele fantate che ridint e mostrave une rie di dincj mai viodude prime. E jere tant biele che mai, e veve une scoladure di chês ch’a fasevin rabiâ i predis e une file di corais ator dal cuel. Ancje lui le cjalave. I jerin vignûts i voi taronds e lis orelis rossis e nus disè: – Chê fantate achì e je une artiste merecane e si clame Lana Turner. Nô no savevin ce dî, di tant instupididis che o jerin. In chel e tornà fûr sô mari che, dute rabiose, i disè al fi: – Cjale mo benedet, tu i disis a la tô murose che impen di mandâti dome il reclam de lane a ti mandi un pôcs di glimuçs, par vie che tu sês une altre volte cui cjalçuts fruiâts e plens di bûs!

di Marisa Gregoris
#1066

1 coments On Tal curtîl

  • Ce biei agns cuant le ingjenuitât jere le samence dal biel vivi, a frutâ un racuei modest ma sincîr cun valôrs ancjemò fûr dal inquinament multimediâl di vuê. Simpri biel leiti Marisa. Lussian.

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît