Strie di famea

Mê none no jere da fâ pôre. Dut il contrari. Jo o crodi che in chê sere e voleve difindi lis storiis che par jê a jerin veretât. Mi pâr di ricuardâ che gno barbe, so fi, al veve fat cualchi coment su lis vieris storiis fantasiosis, tipichis da paîs piçul. E inalore mê none, cuasi cence fermâsi, e à contât trê di chês, che jê e podeve dî di vêlis cognossudis di prime man. Une e je la storie da la strie che e jere a stâ tal so paîs, Gjalarian.
Cheste femine e jere a stâ in une cjase cun puiûl. E la prime robe che e dimostrave la sô cundizion di strie e jere che, fos la ore che e fos, di dì o di gnot, fos Lui scafoiaç o Dicembar glacât, cun ploie a seglots, cun nêf; se si passave denant da cjase sô e si dave une cjalade parsore, jê e jere simpri alì, cui braçs in crôs poiâts sul parepet.
Mê none e rispuindeve a mê barbe, ma jo, che o vevi vot agns, a chest pont mi soi dismenteât de TV e o ai tacât a scoltâ cun la stesse atenzion o plui di chê che o metevi intun film di orôr o di fantasience, di chei che o viodevi lis sabidis daspomisdì. E juste li mê none e à començât a contâ dal striament patît par une fantate dal prin dì des sôs gnocis.
La cuistion e jere che la strie e veve un fi inamorât di tant timp da cheste fantate; sintiment mai corispondût par jê, cun di plui si veve di sposâ cuntun altri. Al è sucedût che dal prin dì daspò di sôs gnocis la fantate e à tacât a sintîsi malade. Ducj i dîs si sveave cuntun fuart mâl di cjâf e une vore debile. E al passave il timp e jê e lave di piês in piês. Nissune medisine e someave comedâ nuie. Fin che un vieli dal paîs al à dit al so om di lâ a viodi li di un plevan ta un paîs dongje, cognossût par fâ “vuarigjon” dai maleficis.
Rivâts da lui le àn contade dute par fîl e par pont dai patiments de zovine. Il predi al restave cidin, come che nol fos nuie. Ma cuant che a son rivâts al pont di riferî che o jerin pene maridâts, il plevan, cjalantju fis tai voi, al à dit: “tornait drets a cjase, discussait il so cussin, brusait dut chel che al è dentri, e si viodìn doman”. Dome chestis peraulis. Al plui svelt che al permeteve il cjar a son tornâts – e lave indenant mê none, e par cumó jo o jeri cun voi e orelis ben viertis come che e fos rivade la sene principâl – e cuant che an taiât il cussin a àn cjatât dentri une vore di robis stranis: pipinots cun formis diabolichis, crôs a forme di x, jerbis salvadiis… dutis robis da chel gjenar. Cence pierdi timp a àn impiât il fûc, e daspò di chest, intant che lis flamis a vignivin sù, jê e à començât a sintîsi miôr.
La cubie e je tornade tal doman di buinoris li dal plevan e e à savût chê altre robe di fâ par cognossi cui che al jere stât a striâle: “Cence dî nuie a di nissun, meteit a fûc biel planc une cite cun aghe e dentri une butilie di vueli sierade. Cemût che la butilie si scjalde ogni volte plui, cui che ti à inmagât, al tacarà a clopâ. Al tratarà da risisti, ma savint ancje che di lassâ rompisi la butilie tal aghe al morarà, al vignarà a bati la puarte di cjase vuestre berghelant che o vês di tirâ fûr che che al è tal fûc, e intal stes moment us gjavarâ fûr dut il striament che al veve pensât par jê o voaltris doi”.
“E propit cussì e finive la storie mê none – la mari dal fi cul amôr impussibil e jere vignude a bati la puarte propit zigant come che al diseve il plevan. Daspò di chê dì lôr doi no àn vût plui problemis”.
Jê si è voltade a cjalâ un tichinin la TV. Intant, gno barbe al sossedave un pôc, tignint i voi intor dal orloi. E si è fât un moment di cidin.
“¿E ce che al è sucedût cu la strie?” Jo i ai domandât.
“Jê e il so fi a son lâts vie dal paîs in mieç de gnot une setemane daspò e no si è plui savût nuie di lôr”.
“¿E son stadis altris storiis di strieçs?” – Jo o insistevi par savê di plui.
“Sì po! Al è il câs da gno fradi tornant da sagre che al no veve di jessi lât  parcè che no si puartavin ancjemò trê mês da corot par mê mari; chê altre dal cjan grant e neri comparît intune cjase dulà che al jere a stâ un vieli trist e muart da pôc, e che simpri al jere sot un lavandin tal curtîl”.
Chestis dôs a restin di contâ une altre volte. Chê gnot soi lât tal jet smaraveât e cence tirâ fûr il cjâf di sot dai bleons.

di Zorz Cesaratto
#1051

4 comments