No sin bessôi II

Une dì o levi a Vignesie in tren cuntune mê amie.
A un ciert pont o vin viodût une lûs tal cîl di misdì, juste cuant che il tren al jere sul mâr. Mi à visât jê di cjalâ chê stele sflandorose e ferme: “Guarda, un UFO!”
Cussì mi berlave. Ma l’UFO al è durât pôc… in pôcs istants si è trasformât in IFO, ven a stâi in ogjet identificât… un avion che al steve aterant tal aeropuart Marco Polo, cu lis lûs dal soreli che si rifletevin su lis alis, che par cualchi istant al viazave perpendicolâr a nô e par chel nus sameave fer.
Di frut, cuant che o tornavi cjase in biciclete dal cjasâl che o savês, o veri pôre di passâ li dai doi pins parcè che o vevi let la storie di une femine che dal 1953 a Brovst in Danimarcje e jere stade frontade di doi stranis oms vignûts jù dai arbui. Oms che no jerin oms ma che a vevin la piel come chê dai pes.
O leievi i libris di Däniken e di Kolosimo e mi lassavi influençâ.
Cumò o soi grant e no crôt plui a chês robis. No sai se o sin pardabon bessôi tal univiers o pûr no, ma cuant che o passi di gnot par chê strade no ai plui pôre che a vignedin jù stranis oms dai arbui… arbui che tra l’altri non son nancje plui (ju àn taiâts)…
Par rivâ dongje di Alfa Centauri, la stele plui dongje di nô dopo dal Soreli, a coventaressin cent agns cirche a une scjatute di struments di pôcs grams di pês movude de energjie fotoniche cun velis grandis come nûf cjamps di balon. Doprant une sonde classiche a coventin adiriture 100 mil agns! Tant e je grande la distance tra une stele e chê altre… ma la int no si rint cont e si incjoche di storiis di aliens che a saressin za ca cun nô…
L’Haunebu i naziscj no lu àn mai costruît… al jere une liende… come che al jere une liende l’UFO di George Adamski ancje se al è biel imagjinâsi une astronâf dal gjenar…
Chês storiis alì mi àn fat vignî une idee… stant che di un pôc di timp incà inte mê vie a àn metût sù dai ferâi gnûfs…

di Checo Tam
#1050

1 comment