Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
No sin bessôi
No sin bessôi. No saressin bessôi, fin dal timp che nus àn samenâts su la Tiere. Fin di chê volte che a àn copât ducj i dinosaurs e dopo a àn lassât cressi i mamifars e a àn sielt tra di lôr chei che a saressin deventâts oms… cul jutori determinant de lôr tecnologjie gjenetiche. Nus àn simpri tignûts di voli. E se no ce saressino stâts i Vimana de Indie? Cjars volants… astronâfs, no?
E il profete ebraic Ezechiele no jerial saltât sù suntune des astronâfs di Jahvè? Dut documentât te Bibie al è…
E chel ogjet volant che si cjate intun cuadri di Hieronymus Bosch no isal un UFO ante litteram?
Di che mont al è mont in tancj a àn viodût in cîl sferis luminosis ma mai come tai agns ’50… ducj i apassionâts si visaran dal contatist american George Adamski e dal so disc volant. Ma, a pensâ ben, ancje te ultime vuere al jere alc… cui levial daûr ai avions aleâts tai cîi de Europe? Jerino i “Haunebu” naziscj ven a stâi discs volants sperimentâi, o astronâfs alienis?
O ai pôre di lôr. O sai che cierts a son tra di nô, cuntun bon travestiment… a samein a nô… ma no son come nô. In realtât a son come lisertis e par chel ju clamin i “Rettiliani”.
Al è un dongje di me a stâ. O soi sigûr. Nol à vite sociâl. Al jes pôc fûr di cjase. Une dì al jere tal curtîl e al fevelave cuntune cane di fier. No. Nol è un mat. Al è un di lôr. Jo mi soi inacuart de strane lenghe che al fevelave. Al comunicave cuntune base. No sai se cun chê che a àn fat sù di tancj secui te muse platade de Lune… o pûr su chê plui gnove che si cjate in Italie, dongje di Pescara, mimetizade come un distributôr di benzine. No soi ciert dulà che a son ma chel strani om che nol è un om al sta dant informazions su di me…
Prest a vignaran a cjolimi, cuntun disc volant che al samee un cjapiel. Une volte lu ai viodût… al faseve un strani rumôr… un rumôr cidin… come une sorte di vibrazion…
Veju! A son chi! O sint la vibrazion cumò… il gno vicin al à comunicât cun lôr… a son pronts a vignî a rapîmi… o viôt une ombre… Diu… al samee un Haunebu… un cjapiel volant… a son rivâts… dulà aio di lâ a platâmi?
Aromai al e masse tart e mi àn scuviert…
di Checo Tam
#1049
2 comments
Lasse une rispueste
Dutis lis contis
Cun dut chel tremôr di stelis che si viôt par ajar le sere , al scugne jessi alc di popolât simil a noaltris, o ju di li, e se chel popul al è plui civilizât di nô, i lôr spions a ju vin di sigûr fûr puarte di cjase cence n’ acuargisi.Disarès che il Checo al è le reincjarnasion dal Verne di îr. Lussian
Checo! Torne!