Cirint la Lune tal Stele

Ca di un moment o sierìn la anade cu la Lotarie di Cjadalan, ma prime, o vin une vore di plasê di mostrâus l’ultin lavôr che la nestre Ostarie e à metût impins. E magari, za che o sin, us contin ancje cualchi alc di plui su la robe.

Scomencin cul dî che nus è capitât di lâ avonde ator pe Basse, tai ultin periodis cuant che ancjemò si podeve lâ ator, e soredut tai paîs tirâts dongje dal Sportel pe Lenghe Furlane tignût de nestre Super Coghe Fuguline. E propit in gracie di chest, al è saltât fûr che a Prissinins a vevin fat il Lunari par il 2021 e dentri di chel a jerin sedi lis fotografiis di chei dal Circul Culturâl Anaxum, une vore bielis (cun dentri cualchi contecurtâr), sedi una schirie di poesiis, cun dentri ancje chi ches di un poete che nus à di pôc mandât la sô prime conte. Insome… parcè no clamâ a meti adun alc Chei di Contecurte?

E cussì al è stât. O vevin timps une vore curts, l’Ostîr al à scrit i tescj di trê contis fatis sù parsore di trê poesiis sielzudis dal Lunari. A son saltadis fûr trê imagjins di une storie maluseriose, però une vore peade al ogjet dal lunari: il flum Stele, ven a stâi Anaxum, come che al dîs l’idronim antigon. L’Ostîr e la Coghe a àn tirât dongje il fidât Famei Checo Tam e intune domenie bielonone di soreli, insiemi cu la clape dai Anaxum e sot la direzion di Michele Carrara, e doprant la musiche des ConFusione in sotfont o vin metût adun il materiâl. Une vore di robe di fâ, a dî il vêr, e al è stât bravonon te post-produzion Michêl de Actionstudio Films a rindi une vore ben sedi lis storiis, sedi lis poesiis e soredut lis performance pôc preparadis di noaltris de Ostarie.

Ce altri dî: us podaressin contâ che si va a risi di barufâ cui pescjadôrs che si sustin e che a cirî di filmâ i claps che a saltin sul pêl de aghe nol è mighe facil. Us podaressin contâ che lis poesiis e lis storiis a son vignudis fûr maluseriosis e lis peraulis de Coghe che a vevin di dâ sperance a son ladis in sie, ma la zornade des ripresis invezit e jere biele e sflandorose e si sin gjoldûts une vore. O podaressin contâus che il nestri Famei al à rivât adore a fâ partecipâ te sô leture ancje un pic e che l’Ostîr al varès propit di lâ a cjatâ un paruchîr, o almancul peâsi in cjavei cuant che al è aiar. O podaressin contâus che il Checo, come une star gotiche e crepuscolâr, si refudave di lei in presince dal soreli e o vin scugnût proviodi a fâlu lâ vie. O pûr che la Coghe e crodeve di vêi ordenât al Ostîr di lavorâ suntune poesie e invezit i veve dite il titul di une altre… Insome, une vore di robis divertentis, ma ce che al conte al è il prodot finâl.

Ae fin dal video o cjatais ducj i riferiments di cui che al à dât la poie e il jutori par la realizazion dal progjet che o ringracin une vore, soredut par vênus dât la ocasion di fâ alc di vîf, dilunc di chest an bisest… Insome… a nô nus pâr che al sedi vignût ben e o vin gust se lu cjalais e lu sparniçais ator