Une invenzion di miarde

Cuant che si invente alc, a pensâi parsore dopo, la idee e pâr cuasi simpri semplice. Al pâr impussibil che e sedi jentrade cussì tart o cussì a planc pe puarte dal mont de tecnologjie. Ma lui al sa che nol è cussì. Al à studiât fisiche, prin e par atitudin, e la seconde lauree le à cjapade in biotecnologjiis, par passion e curiositât. Il mont dal discognossût ma pussibil nol à puartis o puartons, ma dome barconetis e gatui scalembris. E par un di chescj ultins al è passât lui.
Trasformâ la miarde in mangjative no je robe che si invente intun moment. E pûr, dopo i prins prototips, la vie e jere vierte e lui, prin jenfri tancj che a saressin vignûts, al veve rivât a meti adun la ricostruzion des sostancis organichis, partint dal lôr refudum.
La machine e veve la forme di un for a microondis, cu la prionte di un scubulot di jemplâ di aghe – come intes machinis par fâ il cafê – e di cualchi scjate plui piçule par lis sostancis inorganichis – sâl e pôcs altris minerâi.
Metin câs di volê mangjâ (e cagâ) un pagnut cu la mortadele (o cu la sopresse, o il speck). Si pues zontâ ancje une fetute di pancete fumade e une fuee di salate, e parcè di no, un vêl di salsute di coçute spinose, se propit si à voie di fâ i fighets.
Al baste prontâlu, metilu tal machinari e inviâ la memorizazion de imagjine organiche.
Daspò di chel si pues mangjâ il pagnut.
Cuant che al è stât digjerît – e chi e ven la part mancul comerciâl e plui delicade de invenzion – bisugne tigni di cont il refudum organic e tornâ a metilu tal machinari – che dopo la sô prime version al jere stât furnît ancje di un filtri par gjavâ vie i odôrs.
Par un pagnut al baste un cuart di ore e no covente nancje curint, stant che la machine e va a energjie solâr. Partint de imagjine salvade, il rigjeneradôr al met dongje lis molecolis, dopleant e zontant, fintremai a rivâ al prodot origjinâl, che al pues vê cualchi piçule diference di savôr, ma che un gust median (al veve provât cun cualchi volontari) nol jere in câs di dicerni. Il proces al podeve jessi ripetût n voltis, cun n numar finît, ma istès une vore grant (tal ordin dai tre zeros, al veve calcolât).
Insome… cuntun machinari cussì, un pâr di pagnuts e un seglot di aghe a varessin podût disfamâ un intîr vilaç par agns. A rideve di gjonde, cui lagrimons che e dismontavin des palpieris sieradis.
«Ce âtu di ridi, bastart di un neri!»
Ahmed al vierç i voi e al scjasse vie il sium dai riçots neris chel tant di tornâ inca e sintî lis pachis che al à dapardut, cjapadis cuant che lu àn butât jù dal furgon dulà che al jere stât sierât par vot, forsit ancje dîs dîs. Une pidade tes cuestis i reonç une bote e al caine.
«Tâs, cjan!» i dîs un altri metint man al telefonut, «Cumò clamìn il Sindic e i carabinîrs e ti sistemin come che si conven». A son in cuatri oms, al è scûr, ma un scûr diferent, cu lis stelis e l’aiar che al môf lis fueis, di cualchi bande. Lui nol capìs ce che i disin ma al capìs avonde par tornâ a sierâ i voi e cirî di tornâ a la invenzion che si veve insumiade.
Al veve inventât une machine par mudâ la miarde in mangjative, e di miarde, a chest mont, a ce che i pareve di viodi, ‘nd jere une vore.
Intant che al sven une altre volte, sui lavrîs spacâts de sêt, si poie une ridade.

di Milio dai cjans
#1023

1 comment