Unitâts des misuris

A scuele, l’inzegnîr di eletrotecniche al veve il balin des unitâts di misure e ogni volte che al clamave fûr, ae lavagne, il scalognât di turno,  al tacave a messedâle.  Cuale ise la unitât di misure de tension eletriche? Il volt.  E parcé le àno clamade cussì e no, magari, pierino?  Par visâsei di Alessandro Volta che al veve inventade le pile.  E cuale ise la unitât di misure de curint eletriche? L’ampere.  E la unitât di misure dal pês tal sisteme M.K.S.? Il chilogram.  E chê de lungjece, simpri tal sisteme M.K.S.? Il metri. E, invezit, tal sisteme C.G.S ? Il centimetri.  E dulà isal conservât il metri campion?  Tai uficis di Sèvres, dongje Parigji. E a cuale temperadure isal conservât par vie che no si ruvini? A zero grâts centigrats. (Il metri al steve ben ma il guardian al jere simpri plen di rafredôr. – Cussì al contave l’inzegnîr).  E vie indenant par dutis chês altris grandecis: fuarce, lavôr, masse, potence…
Dut al filave ben se un al saveve rispuindi just ma se si inçopedave in alc l’inzegnîr al leve in bestie come che e fos sucedude la fin dal mont. Alore mi vignive la voie di jessi jo a fâi domandis e o jeri sigûr che lui nol varès savût vierzi le bocje.  Cuale ise la unitât di misure dai luvins tal sisteme M.K.S.? La tace. E tal sisteme C.G.S.?  Il bicjerin. E dulà ise conservade le tace campion? Inte credince, in cjase di Placido, a San Zorz di Nojâr, in vie Max di Montegnacco. A zero grâts centigrats?  Nancje par idee. Placido al è libar di impiâ il fûc tal spolert che tant la tace campion no si ruvine e ancje lui al stâ plui ben tal cjalt e nol beche il rafredôr come il guardian di Sèvres. E trop durie le unitât di misure dai luvins? Une stagjon. Par podê vendi une tace di luvins simpri al stes presit di dîs francs, Placido al scugne, par fuarce, par stâi dentri cul vuadagn, fâ riferiment, ogni an, a une tace campion simpri plui piçule.

di Franco Vigo
#1011

2 comments