Si dâur il sorc ai purcits magris

Gjovanin al mangjave dome potacjos e al beveve dome cragnis coloradis cu lis bufulis.
O miôr, a jessi plui precîs, al mangjave e beveve robis che chei de sô famee a consideravin potacjos e cragnis. A scomençâ dal hamburger a lis patatutis, de coca cola rivant al kebab, des merendinis dai distributôrs fintremai a lis pizutis, dal paneton ai biscots, de cjocolate ai gjelatos. Al jere clâr che al stes deventant un bultric, a disevin ducj, ancje se lui, un otante chilos di bocon fantat, plen di sgrimie e di impussibilitât tal stâ fer, ciçon no si podeve dî ch e al fos. A la piês tu podevis dî che al jere un tic tarondut. Ma po, a chê etât li, un zovin al à timp di dimagrî… al diseve simpri so nono par difindîlu.
Ma come simpri e jere stade une femine a vê la grande idee, nuiemancul che la none di Gjovanin, sburtade dai gjenitôrs e di ducj chei altris parincj, une vore ben informâts: di cumò, dome verdure dal nestri ort e cjar sane dal nestri curtîl! I veve dit.
E jù di cocins e poleç.
Jù di blede e cudumars.
Jù di ûfs cence sâl e melançanis grideladis.
Jù di vuainis, salate e lidric cul poc…
I varessin dât di mangjâ ancje i claps, se a vignivin di chel benedet ort!
Dute robe plene di salût, impussibil di dineâ, ma il nestri Gjovanin al pareve lâ simpri al mancul: smavît, maluseriôs, sclagn e flap, a disevot agns a scomençavin za a colâi i cjavei!
E aloe jù inmò verduris! E jù inmò robe di ort! Nancje il pan no compravin plui dal pancôr, ma a vevin tacât a fâlu di bessôi, arant l’ultin toc di zardin par semenâ forment e sorc. Ma nie… Gjovanin al deventave simpri plui Gjovaninut e Gjovaninutin. Al fo cuasi par miracul che, scjampât di cjase, a fuarce di brioches e pagnuts onts e bisonts, al rivà a tornâ in ca e, une volte scuviert il mâl che al veve, a curâsi.
E ancje se al jere un bon frut, i pensà dôs voltis prime di tornâ a cjase e visâ ducj chei de famee che il poleâr, la tetoie dal ort, il laip des bestiis, il rivestiment dal canâl de irigazion e in pratiche dute la arie a jerin stâts fats sù cun dal vieri, grîs, sfruçonabil e… soredut radioatîf ethernit!

di Rafaêl Serafin
#989

2 comments