Pieri e Pauli

Pieri al veve comprât un calcoladôr di tignî in sachete, picinin, che al doprave prin di metisi in code in casse.
Al cirive simpri di stâ dongje i 20 euros, ancje se cun vincç euros ogni 2-3 dîs nol masse facil cumbinâle. Però si rive. E par lui, che prime al veve zero jentradis, e je stade cuasi une rivoluzion.
Cualchi volte, cuant che al voleve tratâsi ben, o che i coventave di cjolisi un caprici, ce saio, une cjocolate, un cuader e une pene, un pâr di mudantis gnovis o adiriture, une volte, une cuvierte in scont, alore al tornave a domandâ un fregul di caritât tal parcament dal supermarcjât. Un pagnut e doi etos di mortadele, a fuarce di bezins di 20 centesims o 50, al rivave simpri a tirâju dongje e la aghe, tal rubinet dal cimitieri, no mancjave mai.
Insome… cuant che si poiave su la bancjute, ben sintât fra picôl e picôl, parcè che distirâsi no ti lassavin, nol podeve dineâ di jessi… di jessi content!
La Vierte si jere mudade in Istât, e cu la panse plui plene si podeve preseâ dutis lis sfumaduris de vite e de nature. Une gjonde tal cûr di no podê parâsi, che al scriveve in storiutis e poesiis che al regalave ae int, o pûr al lassave ator pe citât.
Sigure, al veve simpri chel terôr, cuant che al veve di paiâ, che il bancomat che al veve cjatât par tiere nol funzionàs o i domandàs il PIN, che lui, clare, nol saveve e nol veve mai savût. Ma dopo ducj chei mês, se il paron no si jere inacuart di nuie, al jere pardabon dificil che al suspietàs di alc.
Insome, chel decret che al facilitave i piçui paiaments cu la cjarte di credit, insome, al jere stât par lui la felicitât, e di plui, ae vite, nol podeve domandâ.

***

Pauli al poie i Rayban su la taule e al cjale tal riflès dal veri la machine gnove di pache, parcade pene fûr de sô vile. Al cjape sù il telefonut. La App de bancje lu vise che a son pene jessûts 21,35euros. Al frache il boton dal detai.
Supermercato Esselunga, Rosticceria, bevande.
Al riduce. Al è di mês che al va indevant cussì. La seconde tessare de bancje no la doprave mai, e si jere inacuart dopo une vore di timp di vêle pierdude. Poben, al pense, se un al robe cussì pôc, al vûl dì che al bisugne. Nol jere sigure cui chei cuatri francs che i regalave la felicitât.

di Milio dai Cjans
#997

1 comment