Il fulmin globulâr (la sfere)

Finalmentri! Lu àn fotografât!
E mi è daurman vignude iniment la conte di un che al lavorave cun me agns indaûr.
Pieri al steve lant sù intune strade di montagne in Cjargne cuant che al viodè une lûs che e svolave tal mieç dai arbui. Lui al pensà che plui indevant al varès cjatât un camion dai pompîrs e invezit, passade la curve ve che al notà la lûs… une lûs blancje che e varà vût un diametri di un metri o nancje… e svolave basse, e mandave fûr cualchi scjarie eletriche. Pieri al veve ralentât e le veve viodude ben e si maledive par no vê vût cun se une machine fotografiche. La lûs e le a finî intun rivâl, juste dongje di un piçul  cimitieri. E disparì cuntun sclop.
Lui si fermà tal paîs dopo par bevi un tai in ostarie. Al veve voie di contâ la storie a la int dal puest. Un che al zuiave di cjartis i disè che par lui nol jere un câs se e fos rivade chê lûs… e jere la anime di une frutine dal puest, muarte di incident dumiesti e sapulide juste la dì prime.
Un altri invezit le saveve plui lungje. Al jere un insegnant di liceu. I disè a Pieri: “Lei è stato uno dei pochi ad aver avvistato un fenomeno raro in natura… un fulmine globulare…”
E jo, cjalant chel filmât sul Facebook o ai daurman pensât… ve, il gno coleghe Pieri al veve reson… no si jere inventât nuie… al veve viodût pardabon in Cjargne il fulmin globulâr… velu li tal filmât virâl… une lûs che e cor dilunc des sinis de ferovie, cui sa in cuale bande dal mont. Il fortunât om al devi di vê vût un telefon multifunzion.
Bon. La maravee e je durade pôc par me. O ai un pôc investigât par scuvierzi cun disapont che la lûs dal filmât e jere false… le vevin fate cuntun ‘ordenadôr gjenere imagjinis’
Ma jo o crôt che Pieri nol pues vê contât une bausie. I crôt su la peraule. Lu cognòs. Al à une anime sincere. Pardabon.

di Checo Tam
#995

Achì par viodi il fulmin

1 comment