I cais

A Luvignà di Sot, come in ducj i paisuts di campagne, i oms, finît di lavorâ intai cjamps, si cjatin te ostarie par bevi un tai, prin di lâ a cene.
Dispès, dopo cualchi tai e cualchi porco, cualchidun al tache a peteçâ: “Savêso che a àn viodût la femine di…”. Subit la curiositât dai amîs si sbroche. “Ma sêstu sigûr? E indulà?…”. Il plui informât al è simpri Milio Petegul, che al sa dut e di ducj. Di fat Milio al tete tal tirâ ju la piel a cualchidun e dispès al met dal so par rindi la pitance plui gustose.
Par dî la veretât Milio al podarès tasê parcè che ancje Catine, la sô femine, si cjape plui di cualchi sodisfazion di fûr vie, pal fat che lui nol è masse puartât di chê bande.
Lu sa dut il paîs, fûr che Milio. A disi il vêr cualchi suspiet lu varès ancje lui, ma al cîr di scjafoiâlu tirant jù la piel a chei altris.
Dut câs, a Toni i da simpri plui fastidi il peteçâ di Milio e al cîr di fâlu smeti, simpri cu lis buinis intindintsi. Nuie ce fâ, anzit Milio al devente simpri plui indisponent, cul so peteçâ.
Une sere Toni, che forsit al veve parât ju cualchi tai di plui, nol rive a stratignîsi e al sbroche: “Milio, tâs, che lu sa dut il paîs che tu âs plui cuars sul cjâf tu che intun zei di cais!”; a sintî  cetante robonone, ducj a tasin dal moment. Toni si muart la lenghe, cheste volte le à cumbinade gruesse, ma aromai la fertaie e je fate. A cualchidun i scjampe une riduçade po la ostarie e plombe intun cidinôr mai sintût; no si sint svolâ une moscje. Milio, deventât blanc come un peçot e cence vierzi bocje, al jes de ostarie e al va a cjase.
Te matine dopo il borc al è dut sot sore, no si tabaie di altri; a àn cjatât Catine tal jet intun lât di sanc e Milio picjât intun trâf dal sotpuarti.
La sagre dai cais di Luvignà, chest an no le àn fate.

di Pauli Jacuz
#987

1 comment