Prove di amôr

La cjase e jere propit denant di lui.
I mûrs plens di sclapaduris, il cuviert sdrumât, i barcons disfats. Cualchidun si domandave cemût che e stave ancjemò impins.
So fradi plui grant i veve dit di no acetâ, ma Filip no lu veve scoltât. E jere in bal la bussade di une frute, salacor une cjarece, o pûr un figot. Insome a tredis agns al jere in bal l’amôr!
Cussì, cuant che il capo da bande al veve tirât il clap da sfide, Filip nol veve vût dubis e al veve dit di sì. In fin dai conts al jere facil: jentrâ traviers il barcon dal camarin, passâ pe cusine e saltâ fûr da puarte principâl, la uniche ancjemò di sest.
Spostade la gridele di fier, Filip al jere jentrât inte cjase. Il barconut sclavueç al lassave passâ chê pocje di lûs che e mostrave rudinaçs e tocs di len carulît. Al pensave di cjatâ il cidinôr, ma invezit dut al cricave, fasint incressi al zovin une robe sole: la pôre!
— Al è l’aiar, il svint, salacor cualchi pantiane. — Si diseve sot vôs Filip, tant par cjapâ coragjo, ancje se dentri al pensave ai spirts, aes fantasimis, al diaul in persone.



La scjalute par lâ in cusine e someave stabile. Ma se il prin pît al pareve sigûr, il secont al veve crevât la bree, sfracassantle intun colp sôl. Filip al jere colât par tiere, movint fum e polvar. Un gnotul si jere sveât e al svolave inte stanziute.
Plen di strice il zovin al veve petât un salt, tant che si jere cjatât te cusine, tirant flât a stos, cul baticûr e plen di telis di rai.
La stanzie e jere scure e nereose. Chê pocje lûs che e jentrave pes fressuris dai mûrs e faseve plui induvinâ, che viodi ben. Filip si moveve a planc viers la sacume de puarte principâl, sintint clopâ il breâr sot dai pîts.
Di bot un rumôr. Al jere cualchidun daûr di lui!
Svelt al veve corût viers la puarte e subit tirât la mantie, ma e jere sierade!
Il capo da bande lu veve imbroiât! Maladet!
Ma un colp sec al veve spacât la sieradure.
— Va trancuîl cumò, Filip! — So fradi lu sburtave a lâ fûr.
No jerie ancje chê une prove di amôr?

CovidCurte day 20 – Conte nr. 10
#970

1 comment