Cjar di purcit e vin di cantine a slontanin ogni midisine

Pocjis a son lis robis che no si rivin a movi, a chest mont, e une di chês pocjis a son lis convinzions de int. No si rive mai ben a intivâ cuant che a nassin, su cualis fondis, par cuâi misteriôs parcès, ma cuant che cualchidun si convinç di alc, no son Sants che a tegnin: no esist veretât, o sience, o evidence, o savi consei che al rivi adore a fâi cambiâ sintiment.
E Terenzio, setante Viertis su la schene, tal rispuindi ai curiôs che i movevin la acuse di un acuardi cul diâul, non scjampave di cheste regule.
A lui, che al pareve vê vincj agns di mancul e al veve in cuarp la fuarce di un di zovin di trente, no i vignive migo iniment des lungjis spassizadis tal aiar bon dal crica dal dì, o lis zornadis a boscâ tal vert, cence oraris e fastidis, plenis di fature sane. No i vignivin iniment nancje lis sôs cenis fatis di verduris dal so ort e i gustâs saurîts cu la cjar des sôs bestiis: purcits, gjalinis, cunins, une vacje… che i devin lat, ûfs, arost, bistechis.
No si visave nancje di no jessisi mai sposât, ancje se al veve vût simpri feminis ator; e nancje di no vê mai tardât ni a sveâsi, ni a lâ a durmî, in gracie che nol veve mai pensât che e ves di jessi une ore juste, par chestis azions, ven a stâi che ogni ore e jere chê juste.
E ancje cumò, tant che la albe, daûr de schene, e slusorave il spieli e une barbe cence nancje un pêl di grîs e colave tal lavandin, intal so riduçâ e parsore de taule e jere la sô stramaledete convinzion: mieç litro di vin ros e cinc fetis di salam fresc, grandis cetant di stâ inpins di bessolis. Cussì Terenzio al faseve di gulizion, chest al jere il so acuardi cul diaul. O almancul, lu al jere convint che al fos cussì, e cui al varessial mai rivât a fâi cambiâ idee!

di Rafaêl Serafin
#946

 

3 coments On Cjar di purcit e vin di cantine a slontanin ogni midisine

  • Par restâ zovins bisugne mangjâ salam ogni dî.
    Cence altri e je cheste 😀

  • Il nestri Terenzio nol jere un pote, ma un consecrât de divine providence .Jo disarès che le nomine ” la daûr soreli” ai starès cjalçade come une gjachete di fieste, cun dut chel ben di Diu di alimentazion che sôl il soreli puarte in puart, e che le so man proviodeve a fa cresi, e dopo il biel mistîr ch’ al veve in man, chel di judâ le tiere a prepara i bens di meti in taule e gjoldi di lôr cognosint vite muarts e miracui, da samence fin al plat. E in fin no lâ daûr lis speris de svearine , ma cjapâ ordins dal soreli e la lune cu le libertât di sielzi su di lôr. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît