Lamis

Il re, distirât inte sô chebe, al cîr di indurmidîsi, intant che lis moscjis i businin ator. Al à simpri vivût sierât li. Un re cence scagn, cence corone e cence sedri: dome un tabâr spiluchît ator dal cuel. Al tire sù i voi e al viôt une pavee poiade sul clostri de puarte. Il so istint al torne a impiâsi di bot: i salte intôr, ma la pavee e je di bielzà svualade vie. Cussì al va a sfracaiâsi su lis stangjis de puarte e si inacuarç che… e je vierte! Intun lamp al sparìs inte ombrene dal cjamp dal circ.

«Alore, jo i voi a polsâ». Ramona si plee su Oscar par sgnacâji une bussade sul cerneli. E poie la man su chê di lui, ma chel i rispuint dome a peraulis: «Buinegnot, in curt jo i voi fûr a la riunion cul paron».
«Sì, sì…»  i rispuint jê e intant si invie in cjamare, e siere le puarte e e fâs fente di tacâ a cambiâsi. Par no pierdi timp e à ancjemò sù il vistît di pallette di trapeziste. Ramona e jentre intal piçul bagnut de roulotte e e tache a fâ corî la aghe par cuvierzi i sunsûrs e i siei pinsîrs. E è inamorade di simpri di Oscar: “l’infalibil Oscar”, come che lu an batiât pal spetacul, che al trai i siei curtìs cun precision di chirurc. E un lu à tirât dret intal cûr di Ramona, che si è maridade sigure di vê cjatât l’om perfet.
Oscar si jeve de poltrone e si siere daûr le puarte.

Ancje je si môf svelte. E bute il cjâf fûr de puarte de roulotte e i somee di sintî i pas di Oscar che si slontanin a man drete, de bande contrarie a chê de tende dal paron dal circ. Ramona si oriente restant intal scûr par no fâsi viodi di nissun. Ma cumò no sint plui il pas di Oscar. Si cjale ator. La lûs de roulotte di Alida, la domadore di elefants, e je impiade. Ramona si met sot dal barcon e e spice lis orelis. Di dentri a vegnin sunôrs morestâts e suspîrs. Une gnove lame e travierse il cûr di Ramona, che e decît di tornâ indaûr dut chel dolôr.
E torne inte sô roulotte e e cjôl sù la borse di lavôr dal so om.

Cuant che e rive ancjemò des bandis de roulotte di Alida, la vôs dal so om i rive clare: «Mi neti un moment… i torni daurman, ninine…»
Ramona no si lasse scjampâ chê ocasion.
Cuant che Alida se viôt devant, che ai sburte il curtìs intai budiei, l’ultin so respîr al è di maravee.
Jessint dal bagn, Oscar no si inacuarç nancje dal cinisâr che Ramona i sbat inte cope.

L’om si svee intal mieç de piste grande dal tendon dal circ, leât ae sagume di len che al dopre pal so numar cui curtìs, judât di Ramona che e fâs fente di jessi une “gentile signora del pubblico”.
Un numar di grant efiet, il lôr, soredut cuant che Oscar si tapone i voi par l’ultin tîr. Ma cumò al à i voi discocolâts e pontâts dentri chei di Ramona, che i mostre il prin curtìs. Il tîr al è violent, disperât, e al passe fûr par fûr le cuesse di Oscar. Il second ai inclaude le man ae taule. L’infalibil Oscar al berle, al domande perdon. Ramona e à imparât dut di lui: se cul curtìs tu sâs sparagnâ al è parcé che tu sâs ancje colpî là che al covente. A une spale cul tierç, a un flanc cul cuart curtìs. Oscar, in lagrimis, al à finît lis peraulis par domandâ clemence ae sô femine. Il riflès de lame dal cuint curtìs che Ramona a ten parsore dal cjâf lu incee.

Cussì nol viôt il leon che al salte fûr dal scûr e al sdrume la sô femine. Il curtìs nol covente a nuie cuntri lis sgrifis e i dincj de bestie. Oscar al piert i sens cun lis sbergheladis di terôr di Ramona, slambrade vive, che i revochin te orelis.
Finît di gustâ, il leon si indurmidìs.
Al si insumie la savane e di vê copât une gazele.

di Jacum Trevisan
#944

2 comments