La Briscule des Striis live

E ve ca cualchi fruçon di ce che al è sucedût a Flambri, par chei che e jerin lì e par chei che e vevin cefâ…

Achì o viodês nuiemancul che il nestri Famei, Checo Tam, interpretâ cun maestrie la part di une strie une vore innomenade, a chi in Friûl, la Strie dal Lavôr (intant che la Strie de Fature, la nestre Stralunade Sartorie, e fâs il filmât). Nus conte une storie che al à scrite di pueste par chest event, che e cjacare di briscule, sì, chê des ostariis cui motos, ma a cjacare ancje di altri… Dute di scoltâ!

E dopo je rivade ancje la Strie plui viele di dutis, cu la so sporte che e à dentri ducj i lûc dal mont. Il nestri Ostîr, Rafaêl, nus al à presentade cun rispiet, e nus à disvelât ancje cui che e je la piçule striute che e zire simpri cun jê.

E o savin che o sês une vore seneôs di scoltâ ce contis che e veve la Strie dal Dulà, ven a stâi la nestre Coghe de Osterie, Serene Fuguline. Vele chi une des sôs contis, curte ma plene di sintiment e cuntun finâl che…

E Ce ise une briscule des striis cence la strie che e zuie lis peraulis magjichis. La Strie de Sotanance. Scoltait il nestri Berlon, Michêl Londar, che us tire sù di morâl butantle sul ridi. Se no cognossês la storie che a puarte al Travuart eclesiastic… preparaisi a pissâsi intor dal ridi!

Mascjo o Femine? E scomence cussì la Strie des Creaturis. Une Strie picinine ma potente, interpretade de nestre Massarie, Margarite Cogôi, che cu la so cjapiele e une storie scrite di pueste che nus spie robis incredibilis… come par esempli cui che al si cjate suntun doi… Scoltâ par scuvierzi!