fbpx

Chê po, no po!

Il cjapitani Skzuts e il secont secont pilote Skzogs, a pene rivâts di Alpha Centaurs jessint dal Tunel Spazi Temporâl, a son di gnûf tal Sisteme Solâr par meti lis robis a puest.
Il Comant Gjenerâl Intergalatic ur à comandât di proviodi par corezi la brute plee che e stâ cjapant la ultime mission spaziâl dai umans su la Lune.
La sonde automatiche a rais game, che aromai e je di cjase di chestis bandis par tignî di voli ce che a cumbinin su la Tiere, e à scuviert che la mission spaziâl dai Cinês su la muse scuindude da la Lune, no je nome une mission esplorative.
Chei sacrabolts di mustics zâi a stan pardabon metint adun imprescj par butâ sù missii cun cjâf nucleâr e chest propit nol va jù al Comant Gjenerâl Intergalatic, che al à pensât ben di rompiju i ûfs intal zei.
Il cjapitani Skzuts, denant dal monitor, al viôt dut il cefâ dai Cinês e cuant che i somee che a vedin finît i lavôrs, si zire viers il coleghe: “Skzogs, cumò ur fasin un biel regâl e sperìn che la capissin une buine volte”. Dit e fat; cul so lunc dêt vert al frache il boton ros cun la scrite “SDRUME” e lis bombis atomichis dai Cinês sclopant dutis insiemi, a metin fin a la venture spaziâl cinese su la Lune.
Su la Tiere il Centri Spaziâl Cinês si inacuarç subit de interuzion dai colegaments radio, e dopo vê tentât il dut e pardut par meti lis robis a puest e cirint di dâ la colpe sedi ai Merecans che ai Rus, al scugne rindisi e gloti amâr.

Zirant la astronâf, e imbocjant il Tunel Spazi Temporâl par tornâ a cjase, il cjapitani Skzuts al sbroche: “Pal moment o sin a puest, Skzogs, ma mi sa che plui denant o varìn di tornâ. Mission disbratade, tornin dongje”.

P.S. – I Cinês, su la Tiere, no si dan inmò pâs su ce che al è sucedût; po dopo, vênt spindût un grum di bêçs pardibant par cheste mission, a àn pensât ben di finîle li cuntun biel timbri: ”Mission falide, di no ripeti”.

di Pauli Jacuz

2 coments On Chê po, no po!

  • E velu che Pauli Jacuz al à cjapât gust e cumò nus puarte adiriture su la lune! O forsit no, su la lune al è miôr che no ledin, sâstu mai di stiçâ cualchidun… lis leç dal spazi al è miôr stâ atents di lôr. Dute di lei, chest conte di fantasience!

  • Mostre malore putane, cun dut il cjalt ator Pauli nus puarte ancjmò pi dongje il soreli, però le conte a à mani unevore. I cinês za parons di dute le afriche indulà sgarfa sot tiere materis gnovis, cumò cirin samenâ bulons su le cadope de lune, arant il teren a bombis tomichis, gno copari Sisto Sesul mi disè che sarès mior sbarà su di je cuntune fionde potente asins di blave di samence, cussi a panole fate colarès in tiere polente pronte al puest di tampieste frede. Par furtune che il capo mastri skzogs cul caporâl cjossul a àn comedât lis robis par ben cence lâ a movi pucis piês. Brâf Pauli cu le so fantasie in bolidure che nancje une place di paîs sot il soreli di chescju dîs no rive a tant. Compliments a Pauli a tignî su il morâl. Lussian

Scrîf un coment

This site uses Akismet to reduce spam. Learn how your comment data is processed.

Site Footer