Il ruvignat

Intai agns indaûr, in ducj i paîs che si cjatavin su lis rivis dal Tiliment, e jere usance di lâ a pes cemût che si podeve. In buine sostance par jemplâ la panze si leve a braconâ. La int di chestis bandis la pescje di sfrôs le veve intal DNA, zovins e vecjos nissun tirât fûr. Par plui però lu fasevin cun cussience, nome par meti dongje il gustâ cun la cene e cence esagjerâ.
Des bandis di Vilegnove al zirave un personaç che de pescje di sfrôs al veve fat un mistîr. Anzit plui che un mistîr a ‘nt veve fate une art. Lu clamavin il ruvignat, che a disin al veve di jessi stât des bandis di Ruvigne. Il ruvignat al jere bulo ma cussì tant che nissun vuardian al jere rivât a becâlu cun lis mans tal sac. Lu vevin viodût, di sigûr, ma nome di lontan, che cuant che i rivavin dongje, cirint di no fâsi viodi, al jere bielzà sparît. Po ben, par Nelo, il vuardepescje di Sant Denêl, il ruvignat al jere deventât un claut fis e al varès dât un voli, pûr di rivâ a brincâlu.
I amîs di Nelo, carognis, no mancjavin ocasion par menâlu pal cûl. “E alore Nelo, mi pâr che il ruvignat te à petade ancje ‘ste volte, lu cjapistu o no?”. A Nelo i brusave simpri plui e par parâ jù il marum che al veve dentri al jere simpri plui in confidence cul butilion. Il ruvignat, che al saveve che Nelo je veve zurade, cualchi volte lu lassave svicinâ e po al tacave a cori come un jeur, cence fâsi cjapâ. Une dì Nelo al rive, a tradiment,  dongje dal ruvignat, che al tache a cori come un sfolmenât.: “Fermiti, fermiti!” i zighe Nelo corint. Nuie ce fâ, il ruvignat che nol jere tarondut come Nelo, i fâs mangjâ il polvar.: “Fermiti, fermiti!” Al zighe Nelo tirant flât a grops, aromai restât indaûr. “Fermiti tu, macaco!”, i zighe il ruvignat corint cence voltâsi, “Che no tu âs nissun che ti côr daûr!”. Po ben ancje chê volte a Nelo i va strucje e i tocje  tornâ a cjase, rumiant madonis.
A passin i agns e cumò Nelo al è rassegnât; di salût al va mâl e al pense che i tocjarà murì cence jessisi gjavade chê spine che lu à tormentât par tant timp.
Une dì si ven a savê che Nelo al è intal ospedâl e al va pai ultins. Te acetazion de cliniche si presente un omenut magri e scûr di muse e al domande se si pues lâ a cjatâ Nelo. La impleade, che jessint di Sant Denêl e cognosseve ben il vuardepescje, i dîs il numar de stanzie e lu vise che Nelo al è une vore mâl.
L’omenut al viôt su la puarte de cjamare la femine e la fie che e stan vaint e, disint che al cognòs Nelo e al vûl saludâlu, lu lassin jentrâ. Nelo, che al jere ancjemò un pôc lustri i domande cui che al è. :”Nelo, no tu mi cognossis ma jo ti cognòs ben. O soi il ruvignat e o soi achì par domandâti perdon!”. “Ah, brut porco!” dissal Nelo cuntun fîl di vôs. “Tu sês tu chel che mi à fat tant cori par dibant!” e al slungjie une man viers il ruvignat che je la ten tes sôs. “Nelo!” al tache il ruvignat, “Jo o soi un puar disgraciât, vignût su intune famee disgraciade. Gno pari al è muart cuntune bombe a man braconant tal Tiliment co jeri inmò frut, e me mari e je scjampade vie di cjase bandonant i fîs. Jo o cjatavi sodisfazion nome a pes, che o vendevi par vivi, e no ai podût fâ altri, perdonimi!”. Nelo lu ciale cence dî nuie e al somee che al vedi compassion par lui e par la vite che al à menât. “Po ben, graciis par jessi vignût e met il cjâf a puest!” al finìs Nelo cuntun sunsûr. Il ruvignat al jes de stanzie e, dopo vê braçât par un moment la femine e sô fie, al jes dal ospedâl, cuntune lagrime su la muse.
Nelo al morarà jù pe gnot, a disin cun bocje di ridi.

di Pauli Jacuss

3 coments On Il ruvignat

  • E podevino lassâus il fin de setemane cence une conte gnove di lei? Sì, o podevin, ma o vin decidût di no e alore vele chi, drete di un contecurtâr di vecje date tornât dentri come ostarie come une tonade, il nestri Pauli Jacuss, une conte dolce e mareose insieme, che e met dongje dute une vite e nus lasse cuntun piçul grop tal cuel, ma sodisfats de leture.

  • Un bentornât a Pauli cu lis sôs bielis contis, cheste chi e je propite biele, e met in taule le miserie,lis disgracjis in famee,lis robariis par parasi de fan,e in ultin il rimuars e il perdon a sentâ in pâs le anime sul cuarp.Une conte che a fin leture e madure dentri di nô chel grop intal cuel a stabilî il so valôr.Un brâf a Pauli, e fati sintî . Lussian

  • Bentornât Pauli in ostarie.
    Purtrop la miserie e je une des tantis calamitâts che aflizin la umanitât che le puartin a vuerezâ tra puars.

Scrîf un coment

This site uses Akismet to reduce spam. Learn how your comment data is processed.

Site Footer