Herbert rulez!
Bandiera rossa
Anute si veve maridade cun Carmelo, un bassarûl, e, lant cuintri curint, e jere lade a vivi in Umbrie. Lavorant, ducj i doi, intune fabricute di creps, a jerin rivâts a sparagnâ par podê gjoldi dîs dîs di vacance.
Vûstu par contentâ la femine, vûstu par tornâ a viodi i lûcs dulà che al veve fat il militâr, Carmelo, cul jutori des “pagine gialle”, al veve prenotât di polsâ, la setemane de madone di Avost, intune locande di Tarvis.
Dut ben dilunc dal viaç fat cu la cinccent di seconde man, comprade a ratis, e che, pur scarabotant su lis salidis, e jere rivade a destinazion. Ma un probleme al jere nassût pene rivâts. Tal traviersâ la locande, Anute denant e Carmelo daûr cu le valîs pe man, i vevin sivilât, di scuindon, il cjant dai comuniscj: “Avanti popolo alla riscossa…..”
Carmelo si jere subit sustât.
Al diseve che lui nol veve fate tante strade par vignî a fasi cjapâ pal cûl da cuatri montanârs democristians che, dal sigûr, lu vevin viodût a dismontâ da sô machine targade Perugia. E Anute a cirî di bonâlu disint che no i vevin sivilât a lôr e che, se propit al voleve, al podeve fâ la cuintriprove lânt a cjoli chê altre valîs inmò te machine. Tal traviersâ, pe seconde volte, denant dal piçul bar de locande, i vevin di gnûf sivilât “Avanti popolo” e Carmelo al jere lât in bestie cun Anute. O al sclarive subit le robe cul paron de locande o al tornave cjase sence nancje disfâ le valîs!
Intant che a jerin dongje dal banc, in spiete dal paron, e jere jentrade une siore cun doi fruts e, ancje a lôr,i vevin sivilât “bandiera rossa”. Alore Anute e Carmelo e vevin cjalât miôr. Daûr de puarte e jere une scjaipule cun dentri un mierli indian che, cul pet in fûr, dut sgonf, i deve dentri a sivilâ.
Anute e jere sclopade dal ridi, ma il so om, ancje se al jere un so compagn di partît, il mierli comunist, lu varès displumât e cuet tal for!
Al podeve stâ seren dome parcè che al jere sierât te scjaipule!
di Franco Vigo
#825
2 comments
Lasse une rispueste
Dutis lis contis
O scomencìn vuê a publicâ lis contis dal Contecurte Day! O vin decidût che al è biel cussì e vie ta chestis setemanis che a vegnin lis butarin fûr dutis, lassant lis 4 finalistis ae fin. Si che duncje, ve chi la prime! Une conte ironiche, dulà che il teme dal dîs al jere stât un pôc tirât dentri pai cjavêi, ma che nus regale une sene dute di ridi, a cavaloto jenfri politiche, cjampanilism e gole di ridi. Nus a la regale il nestri Franco Vigo, che cuant che si trate di fâ un regâl ae ostarie, al è simpri pront! A voaltris cheste Bandiere Rosse, e mi racomandi, cuant che la leieis la cjançon a vês di imagjinale cjantade dal nestri poete de Ostarie, Franco Polentarut!
Le potensie di una cjançon a voltis e po fâ efiet plui di une midisine, se a favôr de propite idee e rilasse madurant benstà, se urte l’ ideâl personâl, e po rompi le organizazion interne di un individuo a livei impensabii. Furtune che la font de musiche e vignive di indulà no si po meti colpe . Lussian