Un cjamp di papavars e barburicis

Silvia, par onorȃ l’inovȃl dal Centenari de Vuere Grande dal 1915 al ’18, e veve puartȃt la sȏ classe di arlȇfs de Scuele Mezane a fȃ un percors sul teritori che al jere stȃt teatri di chȇ tragjedie.
E veve sintȗt contȃ in famee la storie dai nonos bis che a vevin combatȗt in chȇ vuere. Nono Pieri al jere lȃt soldȃt di chȇ altre bande, ven a stâi sot l’Imperi Austriac cuant che dut il Friȗl di soreli jevȃt al jere ancjemò sot chel domini.
Lui insiemi a altris doi fradis, di pȏc plui di vincj agns, a jerin stȃts mandȃts a combati in Galizie.
A vevin lassȃt a cjase lis feminis sposis cui frutins di tirȃ sù.
Di lȏr trȇ, dome il nono Pieri al jere tornȃt, i fradis Zuan e Rico a jerin dispierdȗts.
Pieri al jere stȃt ferȋt intune gjambe e par chel al çuetave e nol veve plui podȗt lȃ a lavorȃ tai cjamps come prime, ma si limitave a lȃ te stale a regolâ e curȃ i nemȃi.
La prime robe che al veve fat e jere di pensȃ a lis zovinis veduis dai fradis, lis veve clamadis a vivi cun lȏr tal grant cjasȃl cui frutins che al veve tirȃt sù fasint di pari a ducj, sȋs di plui dai cuatri che al veve za lui. Cheste e jere la storie dal nono Pieri che al veve combatȗt sot l’Imperi Asburgjic, tornȃt ferȋt e cence medais.
Divierse e jere la storie dal nono Medeo che invezit, furlan de Basse di là da la aghe, za sot de Italie, al veve cjapȃt la cartuline di lȃ soldȃt tant che al studiave a Padue.
Dopo vȇ passȃt il cors di adestrament lu vevin mandȃt su la Plȃf là che e jere la ofensive che e varès puartȃt i Talians fin a Triest. Di li e jere scomençade la bataie plui dure cuintri un nemì che al stentave a cedi, ma za scunȋt di fam e malatiis. Dal ’17 al ’18 Medeo si veve fat onȏr pal so coragjo, simpri in prime linee. Duncje al veve vȗt onȏr e decorazions insiemi a lis feridis.
La coriere ju puartave fin a Sante Marie la Lungje intune biele zornade di Jugn, a jerin lis ultimis setemanis di scuele prin des vacancis.
Silvia no voleve contȃur la storie de vuere ma la storie de int che e veve patȋt la vuere. Testemoneancis vivudis de int partint dal bas. Sul front dal Lusinç e restave dome ruine, massacrȃt di lunc e par traviers, dopo chei trȇ agns di plomp che a vevin lassȃt dulintor dome dolȏr e distruzion. I cadavars dai muarts si contavin a miȃrs in muel tal pantan des trinceis.
Dopo une soste a Sante Marie La Lungje la coriere e veve proseguȋt viers Gardiscje dal Lusinç, sul puint di Sagrȃt passant sul flum indarintȃt di lȗs, par rivȃ a Redipulie. La grande scjalinade di marmul blanc e incuteve rispiet e ducj a lavin a lei i nons dai zovins soldȃts che là a vevin lassȃt il sium di une vite crevade. Alore Silvia si rivolzeve ai siei arlȇfs.
“Us doi un compit par doman. Di scrivi alc su cheste zornade par memoreȃ la Vuere Grande, ce che us à lassȃt cheste visite sui lȗcs de memorie. O podȇs scrivi un teme, une riflession, ma ancje se o volȇs fȃ un disegn.” Tal doman durant la lezion Silvia e veve ritirȃt i lavȏrs dai arlȇfs.
Ducj a vevin scrit alc e dome un al veve fat un disegn.
Il disegn al presentave un cjamp di forment cun tancj papavars ros e barburicis, i colȏrs a risaltavin tal aur dal forment. Michele i diseve che passant cu la coriere al jere stȃt colpȋt de imagjin dal cjamp e lu veve fotografȃt cul telefonin e dopo a cjase al veve fat il disegn.
Silvia alore i domandave cuȃl che al jere il messaç.
Michele i rispuindeve cussì: “Il ros dai papavars al è il sanc des feridis, lis barburicis a son lis lagrimis e il forment al è la vite”.

di Egle Taverna

#740

3 comments