A Sant Andree il purcit su la bree, a Sante Catarine…

Dree, patît di balon e simpri pront a slengonâ la sô maniacâl fissazion tal tignî nete la cjase, nol jere ma stât un bon marît e Catine, femine cuiete, ma no insensibile, e veve madressût la sô sielte dilunc dîs e dîs e dîs di vueide vite coniugâl.
Al supermarcjât, par une vore di timp e jere restade a figotâ la scansie dai prodots pe igjene, prin di sielzi il miôr savon. Ae fin e veve decidût par un gnûf bonodôr di lavande e mente, ma Dree, distirât intune posizion pôc naturâl sul paviment de cantine, nol veve vude neancje une peraule di preseament. Dome zemits e lamics, che par fortune tal zîr di pôcs dîs a vevin fermât.
Resentâ chei vincj scjalins e la lôr erte rive jù, par no sbrissâ plui, i veve permetût di zontâ l’util al divertent, e Catine e riduçave intant che e netave, colpide di chê fufigne di pensîr.
Al jere mancul di ridi, invezit, a puartâ vie il cadavar di chel panzon cence utilitât. E veve scugnût doprâ la bree par sopressâ, cjamantlu a fuarce di sburts e pocadis e lant a finîle cun cumbinâ un dam (ta la bree, no tal cadavar, al è clâr), fasintle deventâ imprest di no podê plui doprâ. E jere dal sigûr chê robe li, l’aspiet plui fastidiôs di dute la vicende!

di Rafaêl Serafin

5 coments On A Sant Andree il purcit su la bree, a Sante Catarine…

  • Cheste e je la prime conte dal mês di Jugn, e come che cualchidun al à domandât e proponût, al vares di jessi l’ostîr a meti plui spes contis, e alore parcè no meti la prime dal mês? E alore vele chi. Une conte curte che in origjin e jere stade scrite par talian par il spetacul fat a Talmassons che si clamave Pur Citando Parole. A son un pocjis chestis contis e par furlan, jessint che il titul al è simpri une detule sul purcit, furlane, disìn che a rindin vonde ben. A voaltris il judizi.

  • Une cjosse e je certe,cuant che il nesti ustîr al met di bevi no lu slungje cu le aghe, ma lu met arût e di chel bon, sielt di gjenerose cantine, olsares dî cence falâ, picolit di Feagne. Plasevule conte cence contâ ches di San Simon. Lussian

  • Grassie Lussian!

  • Tu mi as fât pensâ a chel vecjo film… Pomodori verdi fritti: “È ora di bollire il maiale!” “Il segreto è nella salsa…”

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît