Il câs da la grande olme

Il Comissari Rocheton al cjalave fìs, dongje da cise. Spilot intant, al cjaminave sù e jù, spietant che il so amì al disès cualchi peraule.

– Chi al è stât cometût un delit. Un om al è stât copât e il sassin scjampât.

Par tiere si viodeve une grande olme. A jere a forme di om, cui braçs spalancâts. Dentri e in bande da olme, une grande magle rosse scure a veve lassât la tiere ancjemò umide.

– Cjale ben dut, Spilot, cence dismenteâ nuie. Par cjatâ il berdei da soluzion bisugne cjalâ ancje indulà che il voli nol rive. La olme jê ben fonde: chest nus dîs che l’om al jere grues e pesant. Cun di plui, al devi jessi colât par daûr dopo jessi stât sassinât cuntun colp di pistole. Sigûr cjapât dret intal cûr. Baste viodi trop sanc che al à lassât… Puar om!

Cheste volte al jere dificil lâ cuintri al pinsîr dal Comissari Rocheton.

– E cheste, Comissari? – al veve dite Spilot, cjapant sù di dongje la cise un toc di cuarde dute ruvinade, cuntun cjaveç sbregât.

– O vevi viodût ancje jo. E se prime mi restave un dubi su cheste cuarde, cumò o ai za capît. Cussì il delit al devente plui feroç. Di fat, se tu cjalis ben, la olme e à doi braçs e une gjambe sole. Chest al vûl dî che il sassin al à leât las gjambes dal so presonîr, in mût di no lassâlu scjampâ. Po dopo lu à copât cuntun colp di pistole, dret intal cûr. Chel puaret al è colât di un plomp, lassant cheste grande olme cun ator une poce di sanc.

Spilot al veve i voi che si jemplavin di lagrimes, pensant a chel brut sassinament, metût impins cun tante tristerie.

Tornâts dongje da ostarie, pronts par clamâ i carabinîrs, Rocheton e Spilot a sintivin un gran vosament. Pieri Madrac al contave une das sôs stories, sigûr cun cualchi tai in plui tal cuarp.

– … E dato che a jere une zornade sfortunade, – al diseve Pieri, – O ai scugnût puartâ il me spauraç su la schene. Ma rivât dongje da cise, la cuarde si è rote. Il spauraç mi è colât par tiere di un plomp e la butilie di neri stranade dute…

– Spilot… – al veve dit Rocheton. – Eco sberdeât il câs da la grande olme.

• 

  Anonimo has written: 26 di Avost dal 2017 at 3:34 DM Rispuint

  Rocheton nol sbalie une e Spilot nol è di mancul..Bepi
• 

  Anonimo has written: 27 di Avost dal 2017 at 8:24 PDM Rispuint

  Simpri bielis lis contis di Massim,ma jo e dis,spilot e roketon parcè no si butino intal bevi posto che sbaglin simpri il lor judizi. Lussian
• 

  Anonimo has written: 27 di Avost dal 2017 at 9:49 DM Rispuint

  Guai sa si incjochin Lussian, son bogns di induvinâ dut chei doi li…Bepi