Never Stop (Discotheque)

A jerin i agns 80 cuant che Toni e Marc a levin ator tes discotechis par divertîsi, cognossi int e magari “cumbinâ”. A vevin miôr lâ a finîle ta chei ambients dulà che si podeve scoltâ un fregul di musiche rock o punk, o alternative, dark o magari ancje house. Insome, ambients che no fasevin storiis se tu vevis lis cotulis e lis golainis di tô mari pûr jessint om, un çuf zâl fosforessent o i bregons sbregâts o i cjavei parâts sù a fuarce di lache Cadonet. E a balavin bessôi i Cure, i Smiths, i Clash, i Sex Pistols, Siouxsie, Dead Or Alive, Echo & The Bunnymen… no, la solite musicate comerciâl passade a la storie. Chei che no san a disin che la musiche dai 80 e faseve schifo… mah? Forsi chê comerciâl… ma chê alternative e jere bielonone. Intun nûl di fum i doi praticamentri no vevin relazions cui altris aventôrs dal ambient e a speravin dome che une bielone cotonade si ziràs de lôr bande. Toni al oreve cognossi int gnove, soredut fantatis ma Marc al jere gjelôs, vint pôre di restâ di bessôl; cussì al faseve di dut par avilî l’amì.

« Chê là? Che là no ti cagarà mai! No tu le viodis ce ande? »

« Chê li ? Adiu ce brute ! E à i dincj stuarts ! »

« Sêstu mat? No âstu viodût ce nasopio ? »

E vie cussì. Fin cuant che Toni si è stufât e nol è lât plui a cjoli l’amì cun variis scusis. Al leve di bessôl te discoteche. Al pierdè simpri i contats cun chel ostie di Marc, nancje interessantsi plui di chel rompibalis. Cancelât l’amì par simpri.

Une sere Toni al brincà in disco une biele stangje more alte cirche un metri e otante cuntun fisic di modele. No le veve mai viodude prime. E veve la piel un fregul scure e, cuant che lui al tacà a domandâi alc cuntune scuse, jê i fevelà par talian cun acent portoghês. E jere une brasiliane che e lavorave in boutique. Pûr jessint la plui biele de discoteche i fevelà a Toni cun simpatie e cence caghe e lui si impensave di vê fat ben a bandonâ l’amì. Insome, e podeve nassi une relazion. Lui e la biele Romilda si jerin dâts apuntament pe setemane dopo ma, rivade la sabide dopo, lui no le viodè. E nancje chê dopo, e nancje chê dopo. E finì la stagjon e Toni si domandà ce fin che e veve fate Romilda. Sparide.

Cualchi setemane daspò, judant un so barbe al sblancjâ la cusine, le viodè, Romilda. E jere la sô foto suntun sfuei di gjornâl za maglât di tempere; l’articul relatîf a la foto al diseve: INCIDENTE FATALE ALLA GIOVANE COMMESSA .

Conturbât, Toni, al conservà foto e articul.

I agns a son passâts e lui di tant timp si è butât su la piture figurative. I soi cuadris a son biei pardabon… pecjât che al pituri simpri il stes sogjet…

• 

  Giovanni Nello Malisano has written: 28 di Jugn dal 2016 at 6:21 PDM Rispuint

  Culture musicâl, malinconie e un biel furlan. Cun chescj ingredients Checo us Conte i agns otante cuant che jo invezit di scoltà cheste biele musiche o lavi puartâ il gjornâl l’Unita. O jeri propit un coion. E pensâ che mi sintivi, come che si diseve,un zovin "impegnât".
• 

  Barbara has written: 28 di Jugn dal 2016 at 12:10 DM Rispuint

  Une vore biele la conte, di chês che ti strenzin la bocje di stomit par chel che al podeve jessi e il destin nol à volût che al nassi
• 

  Anonimo has written: 28 di Jugn dal 2016 at 2:37 DM Rispuint

  Checo, a miei timps a si leve a cirî di cucâ a la Lucciola di Tierç o ben a la Conca d'Oro di Gonars, ma si veve di contentâsi de Cumparsita par strenzi alc…Bepi
• 

  Anonimo has written: 29 di Jugn dal 2016 at 5:51 PDM Rispuint

  Cuant il distin al reme cuintri, puar Toni a savè le veretat su di un gjornal a protezi il paviment,no crot cal vedi sblancjat chel dì.Biele conte pur te so maluserie. Lussian