E jere une biele zornade di soreli dal mês di Jugn. Laurinç al varà vût cinc o sîs agns. La dì prin, so barbe Toni i veve prometût che lu varès puartât cun lui a seselâ tai cuei di Barêt. Il frut nol podè durmî, pensant al doman: par lui e sarès stade une gjite. A partirin ben adore, Laurinç al jere content come une pasche, al varès vût,
joi… cetantis robis di contâi a sô mari.
Finît il so lavôr tal prin daspò misdì, barbe Toni al cjamà il cjar e ancje al frut che si jere impisulît. Il drandran dal traspuart lu indurmidì dal dut, la sô muse e pandeve gjonde e contentece, si insumiave di rivivi chês bielis oris passadis alì tai cuei: il gustâ al sac, lis marculis, lis tarombulis, il sboreâ cuntun fros tes scuindarolis dai grîs, il soflâ grignei cuntune cjane gargane, sintî il rumôr sclendar des cialis e chel dal riulut de aghe frescje e cjantarine schivant i claps. Dibot, disot dal cuel, alì de strade ferade si sintì un scjas, si faseve indevant a grande velocitât une locomotore che molave lungjis siviladis e neris bugadis di fum, Laurinç daspò dai prins moments di perplessitât, al scomençà a ridi e a bati lis mans saludant il convoi, intant che chest si pierdeve framieç il çuc. Chest al jere il mont ideâl intai siums di Laurinç.
Intant, intal paîs ben altri al sucedeve…
… tornant, Il frut si sveà tal curtîl di cjase sô: – Mame,mame – al clamà legri smontant dal cjar, cuntune scjaipulute, al voleve mostrâi i grîs cjatâts tal prât, ma nissun i rispuindeve. Laurinç, cul so tesaur tra lis mans, si sentà difûr de cjase spietant sorepinsîr a sô mari, di bot al sintì la vôs di une vicine: – Ciristu tô mari? Ven, ven cun me! – in chei moments al pareve che fossin dome lôr doi, no si olmave anime vive, però, man man che a cjaminavin, pes stradis dai dintors si viodeve int che e leve di presse, come volint rivâ prime pussibil ae place. Alc di lì al faseve atrat come la calamite al fier. Il sît al buligave, si nulive une malcuietece gjenerâl. Laurinç, cjatade sô mari, al insisteve cul mostrâi la scjaipulute, ma jê no i faseve câs, come tancj altris e veve i voi pontats sul puiûl dal Municipi, dulà che svintulave la bandiere tricolôr. Dibot da un altevôs si sintì un sgrasaiâ, un sunôr scriulot, une vôs energjiche si imponeve cidinant ogni contrarietât e si fo metintsi dentri des vissaris di chê sdrume di int che jemplave la place:
– Combatents di tiere, dal aiar e dal mâr….!!! –
O jerin ai 10 di Jugn dal 1940. L’Italie e jentrave in vuere.
di Galliano di Buenos Aires
#569
7 comments On Insiums e realtât
O ai a pene viodût un documentari indulà che Mussolini al tacave il discors propit come tu a tu sieris le conte. Mi fasè pensâ che i talians di chei timps a vevin di sei propit mones par crodi e fâi tancj batimans. Ma forsit a jerin juste inocents come il Laurinç.
I siumps dai fruts scjafoiats da albasie dai grancj.Tal gno pais al è sucedut di compagn,e tal torna indaur di che place le int jere dute contente,e puare gno mari che veve provat che dal 15, cjalant dal balcon disè "e cumo provarin il biel".Biele conte che met in belance le nocense dai fruts cu le arogance dai grancj. Lussian
El 2 de Abril de 1982, cuando Argentina entró en guerra contra Inglaterra por las Islas Malvinas, una multitud llenó la histórica Plaza de Mayo de Buenos Aires vivando y apoyando la acción … La Historia siempre se repite, pero nunca aprendemos la lección. Mandi.
Galliano, bielissime storie e une vore ben pandude.
Pecjât che i fruts di cumò, za di piçui a simiotein i grancj ancje tes azions plui semplicis e no an plui la spontaneitât di scuvierzi di bessôi ce mût zuiâ. Un gno nevôt, cuant che nol veve nancje un an, al tocjave i numars dal telecomant de television e po lu puartave a le orele. Di sigûr al veve viodût a telefonâ i grancj e forsit si jere bielzà fate la idee che al fos stât un biel zughet.
Mandi
Pauli Jacus
A Yaio, a Lussian e a Oscar,
graciis pai vuestris ricuarts e riflession.
Mi par di viodi a Laurinç seneôs di mostrai la scjaipulute a sô mari e che jê no le viodeve, ben altri e veve pal cjâf.
Galliano cun braùre, cu lis sôs contis, us ripuarte a la memorie no dome la gjonde di un mont che nol è plui, ma ancje lis tragjediis, come la vuere, che a àn segnade la vite dai nestris vieris. Brâf Galliano.
Nello Malisano
Nello, graciis dal to coment. Bentornât.
O viôt che ogni tant tu cjapis la "Via Francigena". O pensi chel oltri a sei une cjaminade spirituâl e vedi ancje il merit di un moment di fraterne e salutâr amicizie. Mandi.