Ah, ce figade. Mi à fat tornât iniment gno nono, che di piçul al cirive di convincimi che al saveve…
Finzion e realtât tes contis di famee
Gelo, a lis ai letis dutis di cjâf a pît lis tôs contis, fintremai la prefazion e la postfazion. O pues fevelâ di testemoni, ancje se cui voi di frut, vint vivût tal Friûl di mieç, sot la Stradalte par plui di vinç agns a cjaval de Seconde Vuere fin ai prins dal ’60. Chês figuris ch’a tu pinelis cussì ben a mi somee di velis ancjemò denant dai vôi.
Lis ganis, lis striis ch’a leievin la man e i butavin lis cjartis a lis vedranis ch’a volevin savê se valeve la pene di tignî dûr o ben lassâsi lâ a gjoldi la vite; e po dopo i spirts a regnâ, lis cjadenis ch’a sdrondenin di gnot fasint sfolmenâ lis bestiis tes stalis, i fûcs voladis, i mostris come lis magnis e jerin realtâts ch’a si viveve ogni dì e no dome tes contis in file te stale.
Cence dismenteâ lis lotis pai confins, lis botis pes ereditâts tes divisions daspò vê mangjât insiemi il gustâ cul muart su la bree, lotis pal possès di chei cjamps di sore la Stradalte, plens di claps dûrs di arâ e ch’a devin nome cualchi rare panole e un pocje di meniche e che nancje lis rogazions di Vierte a fasevin miorâ. “A peste, fame et bello… Libera nos Domine! A fulgure et tempestate… Libera nos Domine!…” a cjantave la int insiemi cul plevan ator pai cjamps, cence risultâts.
Finide la seconde vuere e je stade fate l’irigazion che à jemplât i cjamps di canaletis e sifons e di chi a son scomençadis lis lotis pai oraris di dâ l’aghe; chel ch’al ere prin la tignive simpri cualchi minût di plui, fasint berghelâ chel dopo ch’al si rivaleve cui interès di chel dopo di lui e cussì vie a cjadene, fintremai che l’ultin al rivave cu la pale par fâ rispietâ il so turni.
I palûts e lis rois di risultive de Basse, la roie dal Puint, la roie Blancje, la Miliane, il Brodis, il Mulin di Torce, la fornâs cun Tine e Toio e la sô biciclete di corse ch’al “vinceve” dutis lis corsis dai amatôrs e diletants, lant fin su la Stradalte a spietâiu e partint di sburide pene ch’al sintive il vosarili lontan dai coridôrs, rivant a la fin sul travuardi prin di ducj, e la int a batii lis mans tant che al vêr vincidôr.
I cjargnei che te Sierade a vignivin ju de Cjargne cui cjars tirâts da mui a baratâ “piruçs, miluçs e coculis, cjastinis di chês buinis” par blave in grignel o ben in panole, e ancje cualchi zumiele di forment. La belance par pesâ a la vevin lôr e a jerin lôr ch’a fasevin il rapuart di scambi, fasint porconâ il nono ch’a no i leve ju di straçâ chel ben di diu de blave e forment, par cuatri miluçs fraits come ch’al diseve lui. Ma lis mamis a savevin che ai fruts i coventavin ancje chei.
E la domenie, prin ch’a rivàs la television, si leve a sintì lis partidis di balon a la radio tes cjasis dai amîs ch’a la vevin: ” Campionato italiano di calcio divisione nazionale Serie A – ventinovesima giornata, Udinese batte Milan 3 a 2″ al diseve Carosio, e po Menegotti, Pinardi, Szoke, Bettini, La Forgia, Raggio di Luna Selmosson e altris rais di biciclete a mandin l’Udin secont daûr dal Milan, cun Menegotti in nazionâl; de rabie a mandin l’Udin in B.
Gjoldi cun pôc a pensâle cumò, ma ta chê volte là al ere ancje masse, parcè ch’a ’nd ere int ch’a veve ancjemò di mancul.
Viôt ca mo Gelo, ce ch’a tu mi âs fât vignî iniment!
di Bepi Zefon
#559
6 comments
Lasse une rispueste
Dutis lis contis
Braf Bepi,tu as zontat al libri di Raffaele chel"amarcord"che in noaltris tant iude a vivi zoventut passade.Lussian
Brâf Bepi,
La storie e somee sei un "revival" cjapât dal voli di une machine montade suntun carel, come chês des ripresis dal cine o de television che al van indenant e indaûr su sinis. Une carelade di chei agns insumis,
Jo chei agns no ju vivei in Friûl, ma dut chel che âs contât lu ai tal gno DNA
Bepi, ce puedio zontâ ai preseaments che ti àn fat Lussian e Galliano. Pues sôl dî che nome chei che an i cjavei blancs a puedin preseâ dal dut il to scrit. E la to memorie e lavore ancjemò ni vore ben. Jo o pensi ancje che fasint ogni tant un “refresh” dai ricuarts, al judi ni vore a tignîju vivarôs. Noaltris o sin fortunâts a vê Contecurte che nus stice a raventâju.
Mandi
Un grassie a Bepi e un grassie a ducj, par tignî vive cheste Ostarie che aromai e je une piçule realtât 🙂
Bepi no ti hai fat i preseaments prime parcè che o jeri cjapât inte cantine a preparâ la robe che vin di puartâ daûr cun no. O ai netât i salams da mufe, lavadis lis tacis, jempladis 5 butiliis (dôs di blanc e trê di neri), preparade dôs damigjanis di 25 litris. (Il vin al ven dal collio). Par ultin o ai prontât un biel toc di ardiel e une sopresse, daspò un bussulot di trê chilos di saradelis sot sâl. A proposit di preseaments no pues no fâju ancje al ostîr che cu lis sôs contis al savût stiçâ la tô imagjinazion. Cumò vonde cun luanis e compliments. Tache a lavorâ par finî la navisele. Tant vuê al varès di rivâ cul tren a Torin ancje Lussian par dati une man.
Nello Malisano
Il merit al è stât des Contis di Famee, cussì dongje de me zoventût, di fâmi vignî iniment ducj chei ricuarts, e inalore grassie a Rafael di velis contadis cussì ben chês contis. Dut câs Contecurtegnove e je une ostarie di gale. Bepi